Франция Миллий Ассамблеяси 15 ёшгача бўлган болаларга ижтимоий тармоқдан фойдаланишни тақиқлаш назарда тутиладиган қонун лойиҳасини қўллаб-қувватлади. Ушбу ташаббус Президент Эммануэль Макрон томонидан ҳам маъқулланган.

Қуйи палата депутатлари лойиҳанинг асосий бандларини муҳокама қилиб, 116 овоз билан қабул қилди. 23 депутат таклифга қарши чиққан. Энди ҳужжат тасдиқланиши учун Сенатга юборилади. Агар мазкур қонун кучга кирса, 15 ёшга тўлмаганлар "Snapchat", "Instagram", "TikTok" каби тармоқларга кира олмайди.

Ушбу қадам интернетнинг болалар руҳий саломатлигига салбий таъсири кучайиб бораётгани билан боғлиқ далиллар ортидан пайдо бўлган глобал тенденцияга хос. Шундай мазмундаги қонун ўтган йил Австралияда қабул қилинган эди.

Янги ҳужжатга кўра, медиа майдонни мувофиқлаштирувчи давлат идораси болалар учун зарарли, деб топилган платформалар рўйхатини тузади ва шу асосда 15 ёшгача бўлганлар учун ижтимоий тармоқ тўлиқ тақиқланади. Зиёни нисбатан кам саҳифаларга эса фақат ота-онанинг ёзма розилиги билан кириш мумкин бўлади.

Шунингдек, қонун лойиҳасида лицейлар, мактаблар юқори синфларида мобил телефондан фойдаланиш ман қилиниши ҳам кўзда тутилган. Айни чеклов аллақачон бошланғич ва ўрта синфларда амал қилмоқда.

Қонун қабул қилингач, Францияда ёшни аниқлаш механизми ишлаб чиқилишига эҳтиёж пайдо бўлади.

Ҳозир Дания, Греция, Испания ва Ирландия ҳам Австралия тажрибасига эргашиш масаласини кўриб чиқяпти. Буюк Британия ҳукумати эса 16 ёшгача бўлганлар учун ижтимоий тармоқни тақиқлаш бўйича жамоатчилик муҳокамасини бошлаган. Тегишли қонун лойиҳаси яқин бир ой ичида Сенат томонидан қабул қилиниши кутиляпти. 

Фардона Яхшибоева, ЎзА