Франция Мадагаскарға 1897 жылы өлтірілген король Тоэранының бас сүйегін қайтарды. Ол 128 жыл бойы Париждегі мұражайда сақталып келген.

France 24 хабарлауынша, Франция Мадагаскарға үш бас сүйегін, соның ішінде 1897 жылы француз отаршыл әскерлері өлтірген король Тоэранының болжамды бас сүйегін қайтарды.

Бұл оқиғаны арал халқы жиырма жылдан астам уақыт күтті. Ол Францияның 2023 жылы мемлекеттік коллекцияларда сақталған адам қалдықтарын қайтару туралы қабылдаған заңының алғашқы практикалық қолданылуы болды.

France 24 дерегіне сәйкес, король Тоэра XIX ғасырдың соңында француз отаршылдығына қарсы тұрған Мадагаскардың батыс жағалауындағы сакалава этникалық тобының көсемдерінің бірі болған. Оның көпшілік алдында өлтірілуі аралдағы отаршылдық зорлық-зомбылықтың символына айналған.

Бас сүйек Париждегі Адам музейінде 128 жыл бойы отаршылдық дәуірінің олжасы ретінде сақталған. Корольдің ұрпақтары оны қайтару туралы өтінішті 2003 жылы-ақ жасаған еді. Қалдықтар Мадагаскар өкіметі өкілдеріне Париждегі Мәдениет министрлігі ғимаратында, министр Рашида Дати мен Мадагаскардың мәдениет министрі Воламиранти Донна Маре қатысқан ресми рәсімде табысталды. Енді ол 31 тамыз күні Мадагаскарға жеткізілуі тиіс.

Хабарда айтылуынша, Мадагаскар үшін бұл қайтарылым терең символдық мәнге ие. Ел президенті Андри Раджоэлина мұны 2019 жылғы сайлауалды уәделерінің бірі еткен. Қалдықтарды 2024 жылдың сәуірінде қайтару жоспарланған еді, алайда корольдің ұрпақтары жергілікті дәстүр бойынша таңдалған жылдың сәтсіз саналатынын айтып, бұл шешімге қарсылық білдірген.