Ўзбекистон Миллий ахборот агентлигининг @uza_uz телеграм канали орқали "Электр энергия таъминотидаги муаммолар бартараф этилиши учун қандай ишлар амалга оширилмоқда?" мавзусида овозли чат бўлиб ўтди.

Кузатувчилар томонидан берилган саволларга «Ҳудудий электр тармоқлари» акциядорлик жамияти Бош бошқармаси бошлиғи ўринбосари Улуғбек Ҳакимов жавоб берди.  

— Туман, шаҳар марказларидаги кўча чироқларидан фойдаланишда тежамкорлик учун қандай ишлар амалга ошириляпти?  

— Тошшаҳарнур ҳамда Тошкент шаҳар ҳокимлиги масъуллари билан биргаликда тадбир уюштирдик. Тадбир натижасида марказий кўчаларимиздаги 6 та чироқдан иккитасини ёқиш бўйича тушунтириш ишларини олиб бордик ва кўча чироқларини ёқилишини камайтирдик. Бундан ташқари, кечки рейдлар ташкил этиб, тадбиркорларимиздан, истеъмолчилардан, дўкон, хизмат кўрсатиш шохобчаларида тушунтириш ишлари олиб боряпмиз. Иложи борича, реклама чироқларининг ҳаммасини ёқмасдан фақат бир қисмини ёқиш талабини қўйдик. Рейдлар орқали энергия тежамкорлигига эришиш ишларини олиб боряпмиз. Бу ҳам ўзининг самарасини беряпти.  

— Фойдаланилмаган электр учун олдиндан пул тўланишининг сабаблари нимада?  

— Ўтган йили электр энергиясини автоматлаштирилган тизими жорий этилди. Бу фойдаланилмаган электр энергияси учун олдиндан тўлов ўтказиш тизими ҳисобланади. Тизимда бу янгиликнинг жорий қилинишидан мақсад – маҳаллаларда, қишлоқларда трансформаторларни янгилаш учун бизга маблағ зарур эди. Янги техникаларни олдиндан сотиб олиб, жойларга етказиш, яъни лойиҳалаш учун албатта биз сотган электр энергия ҳисобига маблағ келиб тушади. Фойдаланилган ва фойдаланилмаган электр энергиясига олдиндан тўлов бўлса, биз соҳанинг ривожланиши учун сарфлаймиз.  

Айниқса, бугунгидек электр энергияси учун синовли кунларда тармоқларимизни янгилаб, подстанцияларни қурмасак, замондан ортда қолишимиз мумкин. Соҳани ривожлантириш, янги лойиҳаларни киритиш учун албатта олдиндан тўлов тизимига ўтишга мажбурмиз.  

Фойдаланилмаган электр энергияси учун олдиндан қилинган тўловлар шунингдек, кадрларни ўқитиш, электр энергиясини узлуксиз етказиб бериш учун йўналтирилади.  

<iframe width="560" height="315" src="https://www.youtube.com/embed/_7k5nOAoves" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Нигора Раҳмонова, Нишонбой Абдувоитов (видео), ЎзА