Александр Авербух, “АШРА” (Исроил) экспорт-кредит агентлиги маркетинг бўйича директори:

— Аввало, Тошкент Халқаро инвестиция форумининг юқори ташкилий даражасини қайд этишни истардим. Бу менинг Ўзбекистонда биринчи марта бўлишим эмас. Ўтган йиллар давомида мамлакат қай даражада ўзгарганига гувоҳ бўлиб турибман. Шунингдек, бу ерда жуда кўп таниқли экспертларни кўришга муяссар бўлдим.

Юртингизга келган хорижлик иштирокчилар билан суҳбатлашгач, Ўзбекистон бугун нафақат Марказий Осиёда, балки барча минтақаларда катта қизиқиш уйғотаётганига ишонч ҳосил қилдим.

Мутахассислар таъкидлаганидек, қишлоқ хўжалиги ва соғлиқни сақлаш бўйича ўзаро манфаатли ҳамкорлик қизғин баҳсга сабаб бўлмоқда. Масалан, Ўзбекистонда қишлоқ хўжалиги жадал ривожланмоқда. Республикада иқтисодиётнинг ушбу йўналишини юксалтириш жараёнига жуда кўп мутахассислар жалб қилинган.

Исроилда аҳолининг, атиги, 3 фоизи шу соҳада меҳнат қилади. Мен исроиллик мутахассисларнинг қишлоқ хўжалигини оптималлаштиришда иштирок этиши орқали шерикликни ривожлантириш мумкинлигига ишонаман.

Компаниямизнинг вазифаси ўрта ва узоқ муддатли экспорт кредитларини суғурталаш орқали Исроил экспортини қўллаб-қувватлаш. Демак, Тошкент халқаро инвестиция форуми Ўзбекистон - Исроил ҳамкорлигида яхши самара беради, деб умид қиламан.

Кристоф Фонтен, “Roxalex” (Франция) компанияси президенти:

— Турли мамлакатлардан келган меҳмонлар орасида эканлигимдан мамнунлигимни яшира олмайман. Мазкур тадбир Наврўз байрами, яъни табиатнинг уйғониш даврида ўтаётанида ҳам рамзий маъно бор. Аминманки, анжуман Шарқ ва Ғарб ўртасидаги иқтисодий алоқалар изчил равнақ топишига хизмат қилади.

Халқаро инвестиция форуми, биринчи навбатда, Марказий Осиё минтақаси юрагида жойлашган Ўзбекистон учун янги имкониятлар эшигини очади.

Кўплаб хорижий инвесторлар, жумладан, Европа мамлакатлари ишбилармонлари Ўзбекистонга сармоя киритиш ниятида. Бу, албатта, мамлакат охирги 5 йилда эришган муваффақиятлар ҳосиласидир.

Ишончим қомил, анжуман Ўзбекистон ва Европа мамлакатлари ўртасидаги ҳамкорликнинг келгуси ривожига сезиларли туртки беради.

Муҳаммадризо Абеш Аҳмадлу, “Iran News Daily” газетаси бош муҳаррири:

— Бу менинг гўзал Ўзбекистонга тўртинчи ташрифим. Умуман, тадбир ажойиб тарзда ташкил қилинган. Энг эътиборли жиҳати, муҳокама панелларида нафақат молия-банк соҳаси вакиллари, балки расмий шахслар ҳам бевосита иштирок этди. Анжуман Ўзбекистонда хусусий секторни янада ривожлантиришга хизмат қилади.

Аминманки, бўлиб ўтган учрашувлар, мунозаралар яқин келажакда ўз натижасини беради. Албатта, Эрон томонидан ҳам форумга кучли қизиқиш билдирилди, оммавий ахборот воситаларимиз Тошкентдаги воқеаларни кенг ёритиб борди. Жуда кўп давлатлардан келган журналистлар форумни ўз она тилларида ёритишди. Шу билан бирга рус ва инглиз тиллари ҳам фаол қўлланди. Бу форум тўғрисидаги маълумотлар кенг тарқалишига кўмаклашади.

Беҳруз Худойбердиев, Улуғбек Маҳмирзаев, ЎзА