Аввал хабар берилганидек, III Тошкент халқаро инвестиция форуми доирасида ўтказилаётган сессия ишида маҳаллий ва хорижлик ташкилотлар вакиллари ўз соҳалари бўйича амалга оширилаётган ишлар ҳақида тақдимот қилмоқда.

Галдаги ўтказилган сессия иши “Янги муқобил, илғор технологик ечимлар. Ўзбекистон учун сувни тежаш технологияларидан фойдаланиш” мавзуига бағишланди. Унда экспертлар мавзу доирасида ўз юртида олиб борилаётган ислоҳотлар ва уларнинг амалий натижалари ҳақида фикрлашди. 

“Ўзсувтаъминот” акциядорлик жамияти бошқаруви раиси в.б Дилшод Азимов ушбу тадбир бўйича ўз фикрини билдирди: 

–Кейинги йилларда мамлакатимизда сув ресурсларидан фойдаланиш тубдан ислоҳ қилинмоқда. Бунда асосий эътибор сувдан оқилона ва самарали фойдаланишга қаратилмоқда. 

Очиғини айтиш керак, сувни тежаш ҳозирги куннинг долзарб масалаларидан. Биз билиб турибмиз, йилдан-йилга сув танқислиги кузатилмоқда. 

Сессия ишида америкалик меҳмонимиз ўз юртида амалга оширилган ишлар ҳақида гапириб берди. Унинг таъкидлашича, бу бўйича олиб борилган ишлар Америка ва ривожланган давлатларда жуда катта натижа берган. 

Яъни, инсоннинг сув ресурсларига бўлган муносабатини ёшлик чоғидан бошлаш керак. Унинг болалигиданоқ, бу неъматни тежаб, авайлаб ишлатиш ҳақида тарбия ва кўникма бериб бориш керак. 

Иккинчи масала шуки, ҳозирги даврда “яшил” энергетикани ривожлантиришга катта аҳамият берилмоқда. Бунда электр энергияси ва сувни тежашда ушбу соҳаларга замонавий технологияларни жалб қилишни жадаллаштириш мақсадга мувофиқ. 

Юртимизда мана шу иккита катта масалага урғу бериб, замонавий технологияларни кенг кўламда қўллайдиган бўлсак, сувдан оқилона фойдаланиш ва унинг натижасида келажакда сувнинг танқислиги билан боғлиқ бир қанча масалаларнинг ечимини топишга эришган бўламиз. 

Насиба Зиёдуллаева, ЎзА