Форс кўрфази можаро ўчоғига айланган бир пайтда минглаб сайёҳлар кема бортларида қолиб кетмоқда. Ҳормуз бўғози деярли ёпилган, ҳаво ҳудудлари бирин-кетин беркилмоқда, натижада на денгиз орқали, на ҳаво йўли билан чиқиб кетиш имкони бор.

“Mein Schiff 4” номи остидаги сув лайнери ҳозирда Абу-Даби портида турибди. Кузатувчиларнинг айтишича, якшанба куни кемага яқин масофада ракета сувга тушган, денгиз устида қора тутун кўтарилган. Бортда тахминан 2 500 йўловчи ва 1 000 нафар экипаж аъзоси бор. Ярадорлар ҳақида аниқ маълумот йўқ, аммо вазият таранг экани айтилмоқда. Йўловчилар Дубай орқали Германияга қайтиши керак эди.

Шунингдек, “Mein Schiff 5” ҳам Доҳада тўхтаб қолган. Айрим йўловчилар самолётга улгурган, бироқ рейслар орқага қайтарилган. Уларнинг айтишича, аэропортда тахминан 10 соат кутгандан сўнг яна кемага олиб кетилган, юклари эса аэропортда қолган.

Кемаларда хавфсизлик чоралари кучайтирилган: очиқ палубага чиқиш тақиқланган, барча йўловчилар ичкарида қолиши шарт, иложи борича ойна ёнига яқинлашмаслик тавсия этилган. 

Фақат икки кема эмас — Дубай, Абу-Даби ва Доҳада жами олти круиз лайнер тўхтаб турибди. Улар орасида “MSC Euribia”, “Celestyal Discovery”, “Celestyal Journey” ва “Aroya” ҳам борлиги айтилади. Ҳозирча эвакуация қачон ва қандай амалга оширилиши номаълум.

Мусулмон Зиё, ЎзА