Жиззах вилоятининг энг чекка ҳудудларидан бири Фориш тумани меҳнаткашлари мамлакатимиз мустақиллигининг 30 йиллигини ўзига хос меҳнат зафарлари билан қарши олмоқда.

Кейинги йилларда Форишда ишлаб чиқарилаётган саноат ва қишлоқ хўжалик маҳсулотларини хорижга экспорт қилиш миқдори йилдан-йилга ортиб бораётгани туман иқтисодиётининг юксалишида муҳим аҳамият касб этаётир.

Туманда 2017 йилда четга маҳсулот экспорт қилиш ҳажми 196 минг АҚШ долларини ташкил этган бўлса, бу кўрсатгич 2018 йилда 1 миллион 820 минг 800 АҚШ долларини, 2019 йилда 2 миллион 391 минг 100 АҚШ долларини, ўтган 2020 йилда 4 миллион 518 минг 700 АҚШ долларини ташкил этди.

Жорий йилнинг биринчи яримида эса Фориш туманидан 3 миллион 740 минг 400 АҚШ доллари миқдорида маҳсулот хорижий давлатларга экспорт қилиниб, бу борадаги ўсиш 2017 йилга нисбатан 194,1 фоизни ташкил этмоқда.

Форишлик меҳнаткашлар жорий йил якунига қадар хорижий давлатларга маҳсулот экспорт қилиш миқдорини 7 миллион 479 минг АҚШ долларига етказишни кўзда тутган. Ўшанда бу борадаги кўрсаткич йил якуни билан 2017 йилга нисбатан 165,6 фоизни ташкил этади.

Туманда тадбиркорлар ва тадбиркорлик субъектлари сони йил сайин ортиб, кейинги тўрт йил ичида 672 та янги корхона ва кичик бизнес субъектлари ташкил этилиб, уларнинг сони 889 тадан 1 минг 570 тага етказилди.

Жорий йилнинг биринчи ярим йиллигида 174 та янги корхона ташкил этилиб, улар сони 1 минг 690 тага етказилди.

Туманда саноат корхоналарини ташкил этиш, маҳаллий хомашёни қайта ишлаш, қурилиш материаллари ишлаб чиқаришни кўпайтиришга ҳам алоҳида эътибор қаратилган. Ушбу йўналишларда охирги тўрт йил давомида туманда 88 та янги саноат корхонаси ташкил этилиб, уларнинг сони 174 тага етди.

2016 йилда туманда хориж билан 2 та қўшма корхона фаолият кўрсатган бўлса, кейинги 4 йил мобайнида яна 18 та қўшма корхона ташкил этилди ва туманда хориж билан ҳамкорликдаги 20 та қўшма корхона фаолият юритмоқда.

Жорий йилнинг ўтган 6 ойида тижорат банклари томонидан тадбиркорларга 48 миллиард 663 миллион сўм кредит маблағлари ажратиб берилди.

Президентимизнинг 2019 йил 21 июндаги “Кичик саноат зоналари фаолиятини мувофиқлаштириш ва бошқаришни янада такомиллаштириш чора-тадбирлари тўғрисида”ги қарори асосида тумандаги “Ўзбекистон” маҳалласида кичик саноат зонаси ташкил этилмоқда.

Туман ҳокимининг қарорига асосан, “Кичик саноат зонаси” учун 10 гектар ер ажратилган. Бу ерга табиий газ, электр энергияси ва ичимлик сув тармоқлари тортилган. Автомобил йўллари қурилган.

Ушбу ҳудудда ўз лойиҳаларини амалга оширмоқчи бўлган ёш тадбиркорларга саноат йўналишида ишлаб чиқаришнинг юзта тури таклиф қилинмоқда. Айни кунда, “Кичик саноат зонасида” битта ташаббускор томонидан лойиҳа тўлиқ амалга оширилиб, ҳар хил ўлчамдаги полиэтилен қувурлари ишлаб чиқариш йўлга қўйилган.

[gallery-3409]

А.Қаюмов, Ж.Ёрбеков (сурат), ЎзА