Саудия Арабиясының Flyadeal әуекомпаниясы Жидда – Наманган – Жидда бағыты бойынша тұрақты түрде тікелей рейстерді бастады.

Uzbekistan Airports баспасөз қызметінің хабарлауынша, 15 қаңтар күні Наманган әуежайында Flyadeal авиакомпаниясының алғашқы рейсі қарсы алынды.

Бортында 350 жолаушысы бар ұшақ жергілікті уақыт бойынша 10:21-де Наманганға қонды. Әдеттегідей, ұшақ су аркасымен қарсы алынған.

Жидда – Наманган – Жидда бағыты бойынша рейстер Airbus А330 ұшақтарымен аптасына үш рет (дүйсенбі, сәрсенбі және жұма күндері) жүзеге асырылады.

Бұған дейін, Flyadeal авиакомпаниясы 2024 жылдың 21 қарашасынан бастап Ташкент және Жидда арасында рейстерді бастаған болатын.

Лоукостер форматындағы Flyadeal авиакомпаниясы Жиддадағы Король Абдулазиз халықаралық әуежайында орналасқан. Компания Саудия Арабиясының жетекші әуе тасымалдаушысы Saudia Group жүзеге асырған трансформация стратегиясы аясында 2017 жылы құрылды.

Бұған дейін, 2022 жылдың 15 қарашасынан бастап Саудия Арабиясының тағы бір әуе тасымалдаушысы – «FlyNas» Жидда мен Ташкент арасындағы рейстер санын көбейткен еді.

«FlyNas» (бұрынғы «NasAir») авиакомпаниясы 2007 жылы құрылған. Таяу Шығыстың жетекші әуе тасымалдаушыларының бірі саналатын компания 2030 жылы жолаушылар тасымалдау көрсеткішін 330 миллион адамға, Саудиямен байланысты халықаралық бағыттар санын 250-ге дейін жеткізуді жоспарлап отыр.

Бұл жаңа әуе қатынастары Өзбекстан мен Саудия Арабиясы арасындағы сауда-экономикалық байланыстарды нығайтуға, сондай-ақ екі елдің азаматтары үшін мәдени және туристік алмасуларды арттыруға мүмкіндік береді. Жолаушыларға ыңғайлы және жылдам әуе қатынасы ұсынылуы, әсіресе екі ел арасындағы жұмыс, оқу және қажылық сапарлары үшін үлкен маңызға ие. Сонымен қатар, осы рейстердің артуы екі елдің туризм индустриясының дамуына да оң әсерін тигізетіні сөзсіз.