Ўзбекистон Республикаси доирасида билан учрашувлар ўтказилди.

АҚШнинг “FLSmidth Inc.” компанияси капитал сотув бўлими бошлиғи Питер Фленаган Ўзбекистон Президентининг Вашингтонга ташрифи тоғ-кон саноати ва саноатни модернизация қилиш соҳасида икки томонлама ҳамкорликни ривожлантириш учун янги имкониятлар очишини таъкидлади:

– Бу биз учун ғоят шарафли ва муҳим воқеа, – дея таъкидлади жаноб Фленаган соҳада вужудга келаётган, инвестициявий ва технологик шериклик кўламини янада кенгайтиришга хизмат қиладиган келишувлар моҳиятига изоҳ бераркан. – Биз Ўзбекистонда фаол ишлаяпмиз. Хусусан, Олмалиқ кон-металлургия комбинатини ривожлантириш лойиҳасида иштирок этмоқдамиз. Айни пайт Американинг илғор технологияларини жорий этиш орқали корхонани тўлиқ қувватга олиб чиқишга кўмаклашяпмиз. Босқичма-босқич фаолият доирасини кенгайтириб бориш режалаштирилган. Мамлакатингиз тоғ-кон сектори истиқболи порлоқ экани кўриниб турибди.

Шунингдек, тадбиркор мамлакатимизда амалга оширилаётган ислоҳотлар ишбилармонлик муҳитини яхшилаш, ҳудудга хорижий инвесторлар қизиқишини оширишга хизмат қилаётганини ҳам қўшимча қилди:

– Кейинги йилларда Ўзбекистондаги иқтисодий ва инвестиция муҳити сезиларли даражада яхшиланди. Президент Мирзиёев раҳбарлигида мамлакат сармоя киритиш ва бизнес юритиш учун ажойиб маконга айланди. Биз фаолиятимизни ҳудудлар бўйлаб кенгайтиряпмиз. Ҳамкорликни узоқ муддатли истиқболда давом эттириш мақсад қилинган.

Бош қароргоҳи Юта штатида жойлашган “FLSmidth” компанияси тоғ-кон ва цемент саноати учун муҳандислик, технологик ечимлар бўйича жаҳон етакчиларидан ҳисобланади. Давлатимиз раҳбарининг АҚШга ташрифи чоғида корпорация раҳбарияти юртимиз корхоналарида инвестиция лойиҳаларини кенгайтириш, жараёнга инновацион ечимлар жорий этишга тайёрлигини билдирди.

Абдуазиз Хидиров, ЎзА