Профессионал бокснинг 5 вазн тоифаси собиқ чемпиони Флойд Мейвезер (50-0) 2021 йил 20 февраль куни ўзининг навбатдаги кўргазмали жангини ўтказади. Унга блогер Логан Пол (0-1) рақиблик қилади.

 Бу ҳақда Мейвезер ва Пол ўзларининг ижтимоий тармоқдаги саҳифаларида маълум қилди. Бироқ мазкур жанг ўтиши керак бўлган жой номаълумлигича қолмоқда.

Логан Пол Youtube тармоғида 22 миллиондан ортиқ кузатувчига эга. У ҳозирга қадар бир маротаба профессионал боксда кўргазмали жангда иштирок этган. 2019 йилнинг ноябрь ойида Пол бошқа бир блогер KSI номи билан машҳур бўлган Олажиде Уильямс Олатунжи билан жанг қилиб, очколар ҳисобида мағлуб бўлганди.

Флойд Мейвезер эса 2018 йилнинг декабрь ойида ўтказилган ўзига хос шоуда япониялик кикбоксингчи Теншин Насукавага қарши бокс йўналишида иштирок этиб, рақибини нокаутга учратган.