Ўзбекистон Миллий университетида давлат ва жамоат арбоби, академик Пўлат Ҳабибуллаев таваллудининг 85 йиллигига бағишланган “Физиканинг ривожида фундаментал-инновацион тадқиқотлар ва уларнинг истиқболлари” мавзуида республика илмий-амалий конференция бўлиб ўтди.

Конференцияда университет проректори Ҳикмат Сабуров академик Пўлат Ҳабибуллаев 5 мингдан ортиқ илмий мақолалар, 15 монография яратгани, 30 нафар доктор ва 100 дан ортиқ фан номзодларини тайёрлагани, илм-фанда эгаллаган ютуқлари, ядро-физика соҳасидаги кашфиётлари ҳақида тўхталиб ўтди. Шундан сўнг профессор А.Саидов академик Пўлат Ҳабибуллаевнинг ҳаёти ва илмий фаолияти ҳақида маълумот берди.   

Pеспублика илмий-амалий конференция давомида иштирокчиларга “Илмга бахшида умр” номли ҳужжатли фильм намойиш этилди. Шунингдек, илмий соҳа вакиллари томонидан Пўлат Ҳабибуллаев илмий мактаби физика фанининг турли йўналишларида оламшумул натижаларга эришгани эътироф этилди.  

 Конференция шўъба маърузалари 5 та секция бўйича давом этди.  

 Маълумот ўрнида, академик Пўлат Ҳабибуллаев критик ҳодисалар ва фазавий ўтишлар соҳасини ўз ичига олган конденцирланган муҳитлар акустик спектроскопияси асосчилардан бири. Академикнинг ғоялари энергетика, кимё саноати, тиббиёт ва биотехнология йўналишларида кенг тадбиқ этилган.  

Файзулло Яҳёев, ЎзА