Бугунги кунда дунё бўйлаб 305 мингдан ортиқ карантиндаги зарарли организмлар мавжуд. Уларнинг юртимиз ҳудудига кириб келиши ва тарқалишининг олдини олиш долзарб масала.

Шу боисдан чегара масканларига бириктирилган инспектор ва кинолог ходимларнинг бу борадаги аҳамияти юқори.  

Тошкент шаҳар ўсимликлар карантини ва ҳимояси бошқармасига қарашли чегара масканларида мамлакатимизга хориждан кириб келаётган ва чет давлатларига чиқиб кетаётган карантин ости юкларини назорат қилишда, зарарли организмларни аниқлашда, кинологлар ва уларга бириктирилган махсус тайёрлов итлари ҳамда ташқи карантин инспекторлари фаолияти йўлга қўйилган.  

Қайд этиш керакки, куни кеча Тошкент халқаро аэропорти чегара маскани орқали Ҳиндистон давлатидан учиб келаётган фуқаронинг қўл юклари ва багажлари карантин назоратидан ўтказилганда фитосанитар сертификати бўлмаган 13,3 килограмм шоли уруғи, 72 килограмм қизилмия илдизи, 15 килограмм Сичуан борлиги аниқланиб, тўхтатиб қолинди.

Далолатнома расмийлаштирилиб, маҳсулотлар экспортёр давлатга қайтариб юборилди. Ҳамда маълум бир қисми ёқиб юбориш йўли билан йўқ қилинди. Бу бўйича efito.uz  сайитига хабарнома жўнатилди.  

Маълумот ўрнида айтиш жоиз, “Ўсимликлар карантини тўғрисида”ги Ўзбекистон Республикаси қонунига кўра, юртимиз ҳудудига олиб кирилаётган, олиб чиқилаётган ва транзит тарзида олиб ўтилаётган карантин остидаги маҳсулот ўсимликлар карантини объектларидан холи бўлиши ҳамда унинг ҳар бир туркуми фитосанитария сертификатларининг асл нусхалари билан таъминланган бўлиши керак.  

Ш.Маматуропова,  

ЎзА