АҚШнинг “Fitch Ratings” рейтинг агентлиги «Иссиқлик электр станциялари» АЖнинг халқаро индикатив рейтингини "ББ-” «Барқарор» даражада баҳолади ва Ўзбекистон Республикасининг суверен рейтингига тенглаштирди.

Бу ҳақда «Иссиқлик электр станциялари» акциядорлик жамиятининг Матбуот хизмати маълум қилди.

Ушбу рейтинг «Иссиқлик электр станциялари» АЖни жаҳоннинг инвестиция бозорларида аниқ ва равшан бизнес стратегиясига, шаффоф молиявий ҳолатига ва кучли корпоратив бошқарув тизимига эга корхона сифатида танитади.

«Иссиқлик электр станциялари» акциядорлик жамияти бош бухгалтери Азимжон Аҳмаджоновнинг маълум қилишича, «ББ-”, яъни «Барқарор» даражаси кредит хавфлари мавжуд бўлиши мумкин экани, бироқ компания инвесторлар ва кредиторлар олдидаги молиявий мажбуриятларини бажара олишини билдиради.

– Мазкур йўналишдаги ишлар «Иссиқлик электр станциялари» АЖ томонидан 2021 йилда бошланган. Жамиятда олиб борилган трансформация ишлари ва молиявий соғломлаштириш саъй-ҳаракатлари натижасида жорий йилнинг январь ойида “Fitch Ratings” халқаро рейтинг агентлигининг тегишли рейтинги қўлга киритилди. Қайд этиш лозимки, жараён давомида Жаҳонда “Fitch Ratings” гуруҳига кирувчи мазкур халқаро рейтинг агентлиги «Иссиқлик электр станциялари» АЖни нафақат молиявий-иқтисодий, балки бизнес стратегияси ҳолати, молиявий модель барқарорлиги ҳамда корпоратив бошқарув тизими ва бошқа йўналишлари бўйича ҳам чуқур ўрганди, таҳлил қилди. Қолаверса, Жамиятга киритилаётган инвестиция кўламининг жозибадорлиги ва уни бошқариш салоҳияти, кредит юкини назорат қилиш бўйича олиб борилаётган тизимли ислоҳотлар самараси мазкур ижобий натижага эришишда муҳим омиллардан бўлди, – деди А. Аҳмаджонов.

Маълумот ўрнида “Fitch Ratings” АҚШнинг йирик корпорацияси бўлиб, асосан рейтинг агентлиги сифатида танилган. У халқаро рейтинг агентликларининг «Катта учлик» деб аталмиш бирлигидан ўрин олган. Жаҳон кредит бозорларини мустақил ва истиқболли кредит рейтинглари, тушунчалари ва маълумотлари билан таъминлашга ихтисослашган.

ЎзА