Финляндия жануби-ғарбидаги Эура шаҳри яқинида икки фуқаролик вертолёти тўқнашиб кетди.

“АзерТАЖ” хабарига кўра, учоқлар саҳнидаги беш кишининг ҳаммаси – бир вертолётда икки, иккинчисида уч нафар инсон ҳалок бўлган. Марҳумлар орасида эстониялик икки тадбиркор ҳам бор.

Ҳодиса маҳаллий вақт билан 12:35 атрофида юз берган. Тўқнашувдан сўнг иккала вертолёт ҳам ерга қулаган. Бир одам гувоҳлик беришича, бир учувчи манёвр қилиб, машинасини бошқа вертолётга ургач, ҳар икки учоқ пастга қараб шўнғиган.

Бири Эстонияда, иккинчиси Австрияда рўйхатга олинган ҳаво кемалари қолдиқлари бир-биридан тахминан 100 метр масофада топилган. Таллиндан бошланган парвознинг якуний манзили Финляндиянинг Кумо аэродроми эди.

Фожиа сабаблари ўрганилмоқда.