Финляндияда Еуропадағы ең ірі Олкилуото АЭС-тің үшінші блогы іске қосылды.

Yle басылымының хабарлауынша, жобаны Teollisuuden Voima компаниясы жүзеге асырды. Реакторды іске қосуға тиісті рұқсатты бір апта бұрын радиациялық және ядролық қауіпсіздік орталығы STUK тарапынан берілген.

Жаңа реакторда электр энергиясын өндіру қаңтар айының соңында ұлттық желіге қосылғаннан кейін басталады деп жоспарлануда. Шамамен 6 айға созылатын сынақ кезеңінде реактор әртүрлі қуаттарды пайдаланып энергия өндіреді. Ол маусым айынан бастап толықтай іске қосылады. Содан кейін реактор елдегі электр энергиясының шамамен 15 пайызын өндірмек.

Финляндиядағы соңғы атом электр станциясы 40 жылдан астам уақыт бұрын, ал Еуропада 15 жыл бұрын пайдалануға берілген.

Олкилуото АЭС - Батыс Финляндиядағы атом электр станциясы болып, ол Ботния шығанағы, Балтық теңізі жағалауында, Олкилуото аралында орналасқан. Қазірдің өзінде жұмыс істеп тұрған екі реактор Финляндияның энергия тұтынуының 16% өндіреді.