Финляндия жүк тасымалдауға арналған Вайниккала теміржол бекетін қоспағанда Ресеймен құрлықтағы шекарасын толығымен жауып тастады.

Финляндия премьер-министрі Петтери Орпо сейсенбі, 28 қарашада заңсыз иммигранттардың ағынына байланысты Финляндия Ресеймен құрлықтағы шекарасын 13 желтоқсанға дейін толығымен жапқанын мәлімдеді.

Осылайша, Ресеймен шекарадағы соңғы жұмыс істейтін өткізу бекеті – «Рая-Йосеп» екі аптаға жабылады. Қалған бақылау бекеттері қараша айында жабылған. Премьер-министрдің айтуынша, шығыс шекараны түгел жабу туралы шешім «Финляндияның ұлттық қауіпсіздігін Ресейдің гибридтік операциясынан қорғау үшін» қабылданған.

Ресеймен шекарадағы тоғыз бақылау-өткізу бекетінің төртеуі 18 қарашаға қараған түні 2024 жылдың 18 ақпанына дейін жабылған. 24 қарашада түн ортасынан бастап Финляндия-Ресей шекарасында тағы үш бақылау-өткізу бекеті жабылды.