Филиппинда 24 октябрдан бери давом этаётган “Трами” тропик тўфони ва “Конг Рай” бўрони туфайли ҳалок бўлгани аниқланган кишилар сони 145 нафарга етди. Бу маълумотни Филиппиннинг PNA ахборот агентлиги Табиий офатларни бошқариш миллий кенгаши (NDRRMC)га таяниб тарқатган.

Aтмосфера, геофизика ва астрономия хизмати бошқармаси (PAGASA) эса ижтимоий тармоқда “Конг Рай” тўфони маркази Cагаян минтақасидан 350 километр масофада қайд этилгани, шамолнинг тезлиги соатига 230 километрга чиққанини билдирган.

Батанес музофоти бўрон яқинлашиб, ўта кучайгач, энг юқоридан кейинги тўртинчи даражани эълон қилди. Расмийлар кема эгаларига денгизга чиқмаслик, денгиздагиларга эса имкон қадар тезроқ хавфсиз портга қўнишни тавсия қилди.

Тайвань томон йўл олган, ҳисоб бўйича йил бошидан буён 21-бўрон экани айтилаётган “Конг Рай” бу йил оролга қараб ҳаракатланган энг кучли тўфон бўлиши кутиляпти.