Филиппин давлати ҳудудига ёпирилган кучли офат – халқаро миқёсда "Меги", дея номланган "Агатон" тропик циклони оқибати бўйича эълон қилинган сўнгги маълумотга кўра, қурбонлар 167 киши.

 Бундан ташқари 110 инсоннинг тақдири ҳозирча номаълум. Ушбу табиий ҳодиса жами 2 миллиондан зиёд фуқаро ҳаётини издан чиқарган. Бу ҳақда “РИА Новости” мамлакат Фавқулодда вазиятлар ва табиий офатлар таҳдиди бўйича кенгаши тарқатган хабарга таяниб ёзган.

ЎзА аввал маълум қилганидек, мазкур пўртана Филиппин орқали 9-12 апрель кунлари ўтди. Натижада 787 жойда сув тошқини, 89 ҳудудда кўчки кузатилган.

Кенгаш ҳисоботида Филиппиннинг 76 шаҳрида электр таъминоти узилгани, 10 300 дан зиёд аҳоли турар жойига жиддий зарар етгани, 664 уй бутунлай қулагани келтирилган. Мамлакатнинг 192 шаҳрида мактаблар ёпилди.
"Агатон" қишлоқ хўжалигига 242,2 миллион филиппин песо (4,6 миллион АҚШ долларидан кўпроқ)си миқдорида зиён етказди.