Филиппин мудофаа вазирлиги Россиядан 16 та Ми-17 вертолётларини харид қилиш бўйича келишувни бекор қилганини тасдиқлади, деб хабар берди Philippine News Agency агентлиги вазирлик вакили Арсенио Андолонга берган маълумотга таяниб.

"Миллий мудофаа вазирлиги Россиянинг ООО "Совтехноэкспорт" компанияси билан 16 та Ми-17 вертолётларини мамлакат ҳарбий ҳаво кучлари учун харид қилиш бўйича шартномани бекор қилганини расмийлаштирмоқда", – деб ёзмоқда агентлик Андологаннинг сўзларига таяниб.

Унинг қўшимча қилишича, “Филиппин ҳукумати мазкур масалада Россия билан дипломатик мулоқот олиб боришга тайёрланмоқда”. Филиппин мудофаа вазирлиги вакилининг таъкидлашича, битимни бекор қилишга "глобал сиёсатда юз бераётган ўзгаришлар келтириб чиқараётган устуворликлар” сабаб бўлмоқда.

Июль ойи сўнгида ОАВ Филиппин ҳукумати Россиянинг 16 та Ми-17 вертолётини сотиб олишдан воз кечгани, бунга АҚШ томонидан санкция жорий қилиниши эҳтимоли сабаб бўлгани ҳақида ёзган эди.

Хабарда айтилишича, ушбу шартноманинг қиймати тахминан 230 миллион долларни ташкил этган.