Филиппин президенти Родриго Дутерте лавозимини тарк этишга ва республиканинг янги етакчисига ўрнини бўшатиб беришга тайёр эканини маълум қилди.

"Мен лавозимимни топшириш кунларини кутяпман, — деди у душанба куни халққа йўллаган телемурожаатида. – Мен янги етакчи билан учрашаман, кейин уни юзма-юз суҳбатга таклиф этаман", деди у. Дутерте шунингдек, уни ниҳоят “кетаётган президент” деб чақиришларини орзу қилганини  таъкидлади. 

Шу билан бирга, кекса сиёсатчи Малаканьянгадан  (Филиппин президентининг расмий қароргоҳи) март ёки апрелда кўчиб чиқишни режалаштираётганини маълум қилди. "Мен буюмларимни йиғиштиряпман, айримларини аллақачон уйимга жўнатдим, — деди у. "Мен қароргоҳни март ойигача тарк этишим керак", — қўшимча қилди 76 ёшли сиёсатчи. 

Филиппинликлар президентни, вице-президентни ва парламентнинг 300 аъзосини 9 майда сайлаб олади. 

Мамлакат конституциясига кўра, Дутерте давлат раҳбарлигига қайта сайлана олмайди.