Өзбекстан ұлттық құрамасы қараша айындағы FIFA күндері аясында Дубайда өтетін халықаралық жолдастық турнирге қатысады.

Бұл туралы Өзбекстан футбол қауымдастығының баспасөз қызметі хабарлады.

Хабарға сәйкес, турнирде Әлем чемпионатына қатысқан құрамалар — Өзбекстан, Иран, Мысыр және Кабо-Верде ұлттық құрамалары бақ сынайды. Кездесулер «Ән-Наср» клубына тиесілі «әл-Мактум» стадионында өтеді.

Алғашқы ойында Өзбекстан құрамасы Мысырмен кездеседі. Егер бұл матчта жеңіске жетсе, финалда Кабо-Верде мен Иран арасындағы жұптың жеңімпазымен ойнайды. Ал жартылай финалда жеңілген командалар үшінші орынға таласады.

Кабо-Верде мен Иран арасындағы матч 13 қараша күні өтсе, Өзбекстан мен Мысыр құрамалары 14 қарашада кездеседі. Үшінші орын үшін ойын 17 қарашада, ал финалдық кездесу 18 қараша күні өтеді.