ФИФА клубтар арасындағы 2025 жылғы әлем чемпионатына арналған ресми жүлде қоры 1 миллиард доллар деп белгіленді. Бұл қаржы 32 команда арасында бөлінеді.

Жалпы 525 миллион доллар тек турнирге қатысқаны үшін төленеді. Еуропа клубтары рейтингке байланысты 12,81 миллионнан 38,19 миллион долларға дейін алады. Оңтүстік Америка клубтарына кемінде 15,21 миллион доллар, ал Азия, Африка және КОНКАКАФ аймағындағы клубтарға кемінде 9,55 миллион доллар беріледі. Океания клубтарына төленетін сома – 3,58 миллион доллардан басталады.

Ал қалған 475 миллион доллар клубтардың турнирдегі нәтижесіне байланысты үлестіріледі. Топтық кезеңдегі әрбір тең ойын үшін 1 миллион доллар, жеңіс үшін 2 миллион доллар сыйақы тағайындалған. 1/8 финалға жолдама алған клубқа қосымша 7,5 миллион, ширек финал үшін 13,125 миллион, жартылай финал үшін 21 миллион, финалға шыққаны үшін 30 миллион, ал чемпион атанған клубқа 40 миллион доллар төленеді.

Осылайша, турнирдің жеңімпазы бір ай ішінде 150 миллион долларға дейін табыс табуы мүмкін. Бұл – қазіргі таңда Чемпиондар лигасында 9 айда жиналатын кірістен де көп. Турнир 2025 жылы АҚШ-та өтеді.