Халқаро шахмат федерацияси томонидан 2026 йил январь ойи учун эълон қилинган турли ёш тоифалари ТОП-100лик рейтингидан Ўзбекистон терма жамоасининг 15 нафар аъзоси жой олди.

Январь ойининг эркаклар рейтингида 5 нафар, аёллар рейтингида 2 нафар шахматчимиз, ёшлар рейтингида 1 нафар, ёш шахматчи қизлар рейтингида 5 нафар, ўсмир шахматчилар рейтингида 4 нафар ҳамюртимиз номи келтириб ўтилди.

Хусусан, катталар рейтингида Нодирбек Абдусатторов(2751) 12, Жавоҳир Синдоров(2726)21, Нодирбек Ёқуббоев(2691) 36, Рустам Қосимжонов(2664) 51, Шамсиддин Воҳидов(2644) 77-ўринларни банд этди.

Аёллар рейтингида хитойлик 4 нафар гроссмейстер етакчилик қилаётган вазиятда Афруза Ҳамдамова 2403 очко билан 41, Гулруҳбегим Тоҳиржонова 2363 очко билан 79-қаторда қайд этилди.

Ёш шахматчилар рейтингида Муҳиддин Мадаминов (2567) 22-поғонани банд этган бўлса, ёш шахматчи қизлар рейтингида Афруза Ҳамдамова 4, Умида Омонова (2334) 13, Гулдона Каримова(2323) 16, Мадинабону Халилова(2287) 24, Нилуфархон Имомқўзиева(2232) 50-ўринларда эътироф этилди.

Шунингдек, ўсмир шахматчиларимиздан Муҳаммадзоҳид Суяров, Олмас Раҳматуллаев, Хумоюн Бекмуратов рапид ва блиц йўналишларининг ТОП-100 лик рейтингидан жой олгани, Афруза Ҳамдамованинг шахматчи ёш қизлар орасида рапид йўналишида ТОП-100лик етакчилигига эришгани ўзбек шахмат мактабининг салоҳияти йилдан йилга кўтарилишга эришаётганини кўрсатмоқда.

Эслатиб ўтамиз, катталар ўртасида жаҳоннинг энг кучли шахматчилари рейтингини норвегиялик Магнус Карлсен 2840 очко билан бошқараётган бўлса, АҚШлик Хикару Накамура ва Фабиано Каруана кейинги поғоналарни эгаллади.

Тўлқин Рўзиев, ЎзА