Халқаро шахмат федерацияси (FIDE) 2026 йил январь ойи учун янгиланган рейтингни эълон қилди.

Ўзбекистон шахматчилари учун эътиборли жиҳати, аёллар рейтингида терма жамоамиз илк бор Топ-15 таликка кўтарилишга муваффақ бўлди.

Куни кеча Қатарда поёнига етган рапид ва блиц бўйича жаҳон чемпионатида муносиб иштирок этган Ўзбекистон аёллар терма жамоаси 12-ўринга кўтарилишга эришди.

Айтиш лозим, мазкур рейтинг 10 нафар шахматчимизнинг ўртача рейтинги асосида тузилган. Жаҳон чемпионатида кучли саккизталикдан жой олган Умида Омонова, Гулруҳбегим Тоҳиржонова, Афруза Ҳамдамова каби шахматчи қизларимизнинг ўзига хос натижага эришиши кўрсаткичларимиз яхшиланишига ижобий таъсир кўрсатди.

Бу, Ўзбекистон аёллар шахмати учун тарихий натижа эканини таъкидлаган ҳолда ўтган йилнинг шу пайтида эълон қилинган жаҳон рейтингида терма жамоамиз 38-поғонани банд этганини эслаш лозим.

Эслатиб ўтамиз, FIDEнинг янгиланган рейтингида АҚШ терма жамоаси етакчиликка эришган бўлса, кейинги ўринларни Ҳиндистон ва Хитой жамоалари эгаллади.

Т.Рўзиев,

ЎзА