Тошкент шаҳрида жаҳон автоспортидаги муҳим тадбирлардан бири — Халқаро автоспорт федерацияси (FIA) Бош ассамблеяси ҳафталиги расман бошланди. “Ўзбекистон” халқаро форумлар саройида ўтказилган очилиш маросимида FIA Президенти Муҳаммад бин Сулайем, Ўзбекистон Республикаси Спорт вазирлиги ва Миллий олимпия қўмитаси раҳбарияти, шунингдек, федерацияга аъзо ташкилотлар вакиллари иштирок этди.

Маросимда Ўзбекистон Республикаси спорт вазири Адҳам Икромов қатнашчиларни қутлар экан, мамлакатда спорт соҳасини ривожлантириш, инфратузилмани такомиллаштириш ва халқаро ҳамкорликни кенгайтириш борасида амалга оширилаётган ишларга тўхталиб ўтди.

FIA Президенти Муҳаммад бин Сулайем ўз нутқида Бош ассамблея ҳафталигининг Марказий Осиёда илк бор ўтказилаётгани муҳим воқеа эканини қайд этди. Шунингдек, йил давомида турли йўналишларда фаоллик кўрсатган бир қатор жамоалар ва ташкилотлар расман тақдирланди.

Бош ассамблея доирасида автоспорт билан бир қаторда йўл ҳаракати хавфсизлигини таъминлаш масалаларига ҳам алоҳида эътибор қаратилади. Ўзбекистон мазкур глобал ташаббусларни қўллаб-қувватлаган ҳолда, йўл-транспорт хавфсизлигини ошириш ва бахтсиз ҳодисаларни камайтиришга қаратилган халқаро ечимларни муҳокама қилишда иштирок этмоқда.

Тадбир доирасида FIA Президентлиги учун сайлов ўтказилиши режалаштирилган. Шунингдек, автоспорт мутахассислари ва ишқибозлари учун махсус кўргазмалар ташкил этилмоқда. Жумладан, Конструкторлар кубоги соҳиби “Макларен” жамоасининг чемпионлик болиди намойиш этилиши кутилмоқда.

Йил якунига бағишланган анъанавий “FIA Awards” маросимида “Формула-1”нинг амалдаги жаҳон чемпиони Ландо Норриснинг илк бор Марказий Осиёга ташриф буюриши режалаштирилган. Тадбирда Оскар Пиастри, Макс Ферстаппен ва автоспортнинг бошқа етакчи вакиллари ҳам иштирок этиши кутилмоқда.

FIA Бош ассамблеяси ҳафталигининг Тошкент шаҳрида ўтказилиши мамлакатнинг халқаро спорт майдонидаги нуфузи ортиб бораётганининг яна бир тасдиғи.

<iframe width="650" height="420" src="https://www.youtube.com/embed/ewU4I955VqI" title="FIA Bosh assambleyasi tantanali ochilish marosimi o‘tkazildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Жавоҳир Тошхўжаев, ЎзА мухбири