Toshkentda V Yevrosiyo farmatsevtika sammiti o‘z ishini boshladi. Tadbir Global Pharmaceutical Leaders’ Club farmatsevtika sohasidagi yetakchi kompaniyalar top-menedjerlari hamjamiyati tomonidan Farmatsevtika mahsulotlari xavfsizligi markazi hamda O‘zbekiston Respublikasi Sog‘liqni saqlash vazirligi huzuridagi Farmatsevtika tarmog‘ini rivojlantirish agentligi ko‘magida tashkil etildi.
Asklepiy Group, NikaPharm, AstraZeneca, IQVIA, ProximaResearch, «Olaynfarm», STADA kompaniyalari sammitning yetakchi hamkorlari bo‘ldi. 100 nafardan ziyod spikerlar ishtirok etgan tadbir Markaziy Osiyo, Kavkaz va Sharqiy Yevropa mamlakatlari (O‘zbekiston, Qozog‘iston, Qirg‘iziston, Tojikiston, Turkmaniston, Ozarbayjon, Armaniston, Gruziya, Moldova, Belorus va Mo‘g‘uliston) farmatsevtika bozorlarining davlat va tijorat segmentida rivojlanish tendensiyalarini muhokama qilish maqsadida tashkil etilgan.
Poytaxtimizda 17-19 sentyabr kunlari bo‘lib o‘tadigan sammit dasturi 20 ta sessiyani o‘z ichiga oladi. Ularda farmatsevtika kompaniyalarining strategiyalari, soha bozorining sarmoyaviy salohiyati, dori vositalarini markirovka qilish, sohaga raqamli texnologiyalarni joriy qilish va boshqa mavzular ko‘rib chiqiladi. Shuningdek, xalqaro ekspertlar bilan suhbatlar, yetakchi farmatsevtika korxonalari va dorixonalar tarmoqlarining top-menedjerlari bilan uchrashuvlar, davra suhbatlari tashkil etiladi.
Tadbirni Global Pharmaceutical Leaders’ Club direktori Natalya Bayeva tabrik so‘zi bilan ochdi va ishtirokchilar ishiga muvaffaqiyat tiladi. IQVIA kompaniyasining Rossiya va MDH konsalting guruhi rahbari Olga Makarova tadbirni olib bordi. Shuningdek, tadbirda Sog‘liqni saqlash vaziri o‘rinbosari Farrux Sharipov, Farmatsevtika tarmog‘ini rivojlantirish agentligi direktori Abdulla Azizov, Farmatsevtika mahsulotlari xavfsizligi markazi direktori Alisher Temirov hamda Qozog‘iston, Ozarbayjon, Moldova va qirg‘izistonlik ekspertlar so‘zga chiqdi.
So‘nggi yillarda dunyoda pandemiyadan tortib iqtisodiy va geosiyosiy to‘ntarilishlargacha bo‘lgan mislsiz global chaqiriqlar yuz berdi. Bu o‘zgarishlar sog‘liqni saqlash jamiyat farovonligining eng muhim omili ekanini ko‘rsatdi. Shu nuqtai nazardan O‘zbekistonning erishayotgan yutuqlari, tibbiyot va farmatsevtika tarmog‘idagi istiqbollar e’tiborga loyiq.
Qayd etilganidek, so‘nggi yillarda davlatimiz rahbari boshchiligida O‘zbekiston sog‘liqni saqlash tizimini rivojlantirishga katta e’tibor qaratilmoqda. Davlat dasturi doirasida mamlakatimizdagi 100 dan ziyod tibbiyot muassasalarining modernizatsiya qilinishi bu boradagi muhim yutuqlardan biri bo‘ldi. Bu ayniqsa chekka hududlarda tibbiy xizmat ko‘rsatishni sezilarli darajada yaxshilash imkonini berdi.
2024 yilning birinchi yarmida farmatsevtika mahsulotlarini ishlab chiqarish hajmi 180 million dollardan oshdi, bu o‘tgan yilning shu davriga nisbatan 115 foiz ko‘pdir. Mahsulot eksporti besh baravar oshib, Fransiya, Germaniya, BAA va Daniya bozorlaridan joy oldi. Sohaga kiritilgan xorijiy sarmoya 27,5 million dollarni tashkil etdi. Bu o‘tgan davrga nisbatan 3,4 barobar ko‘pdir. Bu ko‘rsatgichlar tarmoqning sezilarli darajada rivojlangani va salohiyatini ko‘rsatadi. 2024 yilda mamlakatimizda tibbiyot xodimlari malakasini oshirish, jumladan xorijdagi yetakchi tibbiyot markazlariga ularni stajirovkaga yuborishga qaratilgan bir nechta ta’lim dasturlari amalga oshirildi.
Tadbirda shuningdek, mamlakatimiz farmatsevtika mahsulotlarini tijoratlashtirish masalalari ham muhokama qilindi. Butun sog‘liqni saqlash tizimining asosi bo‘lmish birlamchi tibbiy-sanitariya yordamga alohida e’tibor qaratilmoqda. Tizimning samarali ishlashi kasalliklarni erta bosqichda aniqlash, ularni rivojlanishining oldini olish va ixtisoslashtirilgan tibbiyot muassasalarining yukini kamaytirish imkonini beradi. Tibbiyot xodimlari uchun tashkil qilingan ta’lim dasturlari, jumladan ularning xorijga stajirovka o‘tashi xalqaro tajribani o‘rganib, uni mamlakatimizga joriy qilishga yordam beradi.
Sog‘lom turmush tarzi, to‘g‘ri ovqatlanish va jismoniy faollik - surunkali kasalliklarni oldini olishning muhim jihatidir. O‘zbekistonda sog‘lom turmush tarzini jamiyat madaniyatining ajralmas qismiga aylantirish bo‘yicha fuqarolarni xabardor qilishga alohida e’tibor qaratilmoqda.
V Yevrosiyo farmatsevtika sammiti ishtirokchilarining chiqishlari mamlakatimiz sog‘liqni saqlash va farmatsevtika sohasida yetakchi o‘rinlarda ekanini ko‘rsatdi. Tibbiyot infratuzilmasini modernizatsiya qilish, yangi texnologiyalarning joriy qilinishi va faol xalqaro hamkorlik - bularning bari mamlakatimizni soha yetakchilaridan biri bo‘lishiga zamin yaratdi. Professional kadrlarning qo‘llab-quvvatlanishi samarasida, respublikamiz yangi yutuq va muvaffaqiyatlar sari dadil qadam bosmoqda.
Tadbir yakunida Eurasian Pharma Awards 2024 tanlov g‘oliblari taqdirlanadi. Eslatib o‘tamiz, o‘tgan yili yurtimizdagi «OXYmed» dorixonalar tarmog‘i “Yilning dorixona tarmog‘i” nominatsiyasida g‘olib deb topilgan edi. Sammit doirasida shuningdek, Asklepiy Group dori tarqatish ombori hamda Nika Pharm dori vositalarini ishlab chiqarish zavodiga tashrif uyushtirish ham rejalashtirilgan.
Alpomish Mashrabxonov,
O‘zA