Дори воситаларини давлат рўйхатидан ўтказиш ушбу жараёнда иштирок этувчи барча мутахассислардан катта масъулиятни талаб этади. Уларнинг билимлари ва тажрибаларини доимий равишда такомиллаштириб бориш ғоятда муҳим.

Давлатимиз раҳбарининг 2024 йил 23 январдаги “Фармацевтика соҳасини тартибга солиш бўйича қўшимча чора-тадбирлар тўғрисида”ги фармонида Фармацевтика маҳсулотлари хавфсизлиги маркази фаолиятини такомиллаштириш белгиланган бўлиб, мазкур топшириқлар ижросини таъминлаш юзасидан пойтахтимизда Марказ мутахассислари учун махсус ўқув-семинар ташкил этилди.  

Марказнинг дори воситаларини рўйхатдан ўтказиш фаолиятини тубдан янгилаш ва дори воситаларининг ҳужжатларини қабул қилиш, текшириш амалиётини такомиллаштириш мақсадида ўтказилган мазкур семинарда халқаро экспертлар ўз маърузалари билан иштирок этди.  

– Ўқув машғулотларига халқаро даражадаги маърузачиларнинг жалб этилгани  биз учун тажриба алмашиш, билим ва малакамизни ошириш учун яхши майдон бўла олди, – дейди Марказ мутахассиси Камола Ҳакимова. – Машғулотларда жаҳон тажрибасидан келиб чиққан ҳолда айнан дори воситаларини рўйхатдан ўтказиш жараёнида уларнинг норматив техник ҳужжатларига тўғри баҳо бериш, уларни баҳолашда қандай мезонларга амал қилиш борасидаги билимларимизни бойитдик.  

Семинар давомида соҳага жаҳон стандартларини жорий қилишда ходимлар малакасини ошириш юзасидан Марказ мутахассисларининг назарий билимларини мустаҳкамлаш бўйича мавзуга доир савол-жавоблар ва амалий машғулотлар ташкил этилди.  

<iframe width="640" height="420" src="https://www.youtube.com/embed/pab7iERmvZY" title="Farmatsevtika sohasi mutaxassislari uchun maxsus oʻquv-seminar" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

4 кун давомида бўлиб ўтган семинар якунида тингловчиларнинг ўзлаштирган билимлари тест синовларидан ўтказилиб, уларга махсус сертификатлар топширилди.  

Моҳигул Қосимова, ЎзА