АОКАда ўтказилган брифингда Фармацевтика тармоғини ривожлантириш агентлигининг “Зарур амалиётлар маркази” томонидан 2023 йил давомида амалга оширилган ишлар тўғрисида маълумот берилди.

Таъкидланишича, Марказга 2023 йил давомида фармацевтик инспекциялар ўтказиш юзасидан жами 752 та ариза келиб тушган. Булардан 19 таси маҳаллий корхоналарда ва 295 таси хорижий корхоналарда GMP инспекцияси ўтказиш бўйича, 294 таси маҳаллий дистрибюторларда GDP инспекцияси ўтказиш бўйича, 1 таси хусусий божхона омборхонасида GSP инспекцияси ўтказиш бўйича ва 15 таси дорихоналарда GPP инспекцияси ўтказиш бўйичадир.  

Ушбу аризалар асосида 19 та маҳаллий корхонада ва 35 та хорижий корхонада GMP юзасидан, 153 та маҳаллий дистрибюторда GDP юзасидан ҳамда 1 та хусусий божхона омборхонасида GSP юзасидан ва 4 та дорихонада GPP фармацевтик инспекция ўтказилган.  

Шу билан бирга, аввал берилган сертификатларнинг амал қилиш муддатини тасдиқлаш мақсадида жами 64 та инспекция назорати ташкил этилган.  

Корхоналарда сертификатлаштириш текширувларини амалга оширишдан олдин ихтиёрий ўтказиладиган баҳолаш инспекциялари юзасидан келган мурожаатларга асосан 1 та GMP ва 2 та GDP баҳолаш инспекциялари ўтказилган. Аниқланган номувофиқликларни бартараф этиш учун ўрнатилган тартибда муддатлар берилган. Ариза берувчилар томонидан ушбу номувофиқликлар тўлиқ бартараф этилганидан сўнг уларнинг мурожаатлари асосида жами 180 та қайта фармацевтик инспекциялар уюштирилган.  

Натижада 12 та маҳаллий ва 11 та хорижий корхонага GMP сертификатлари, 115 та маҳаллий дистрибюторга GDP сертификатлари ва 1 та хусусий божхона омборхонасига GSP сертификати тақдим қилинган.

4 та маҳаллий ва 2 та хорижий корхонага GMP сертификати ҳамда 10 та маҳаллий дистрибюторга GDP сертификати тақдим қилиш рад этилган.  

Брифингда шунингдек,  халқаро ҳамкорлик бўйича ҳам сўз юритилди.    

– Ўзбекистон Республикаси ҳамда Россия Федерацияси ваколатли органлари томонидан тақдим этилган GMP сертификатларининг ўзаро тан олинишини йўлга қўйиш борасида бир қатор ишлар амалга оширилмоқда, – деди Фармацевтика тармоғини ривожлантириш агентлиги ахборот хизмати раҳбари Севара Тўлаганова. – Маҳаллий ишлаб чиқарувчилар томонидан ишлаб чиқарилган дори воситаларини Россия Федерациясида рўйхатдан ўтказиш жараёнини енгиллаштириш ва бу орқали экспорт ҳажмини ошириш мақсадида агентлигимиз ҳамда Россия Федерацияси Саноат ва савдо вазирлиги Фармацевтика ва тиббиёт саноатини ривожлантириш департаменти ўртасида тегишли йўл харитаси тузилди, ишчи гуруҳ ташкил этилди. Унда дори воситаларини ишлаб чиқарувчи корхоналарда ўтказиладиган фармацевтик инспекцияларга ёндашувни баҳолаш мақсадида қўшма инспекциялар ўтказиш кўзда тутилган. Россия Федерациясининг GMP йўналишидаги инспекторларининг ёндашувларини баҳолаш мақсадида 23-24 ноябрь кунлари Тошкентда жойлашган “RADIKS” МЧЖ ишлаб чиқариш корхонасида ҳамкорликда фармацевтик инспекция ҳамда Москвадаги инсулин дори воситасини ишлаб чиқарувчи “Герофарм” корхонасида Марказ ходимлари томонидан қўшма инспекция ўтказилди.  

Моҳигул Қосимова, ЎзА