Фарғона вилояти Қўштепа туманида яшовчи Наргиза Шерхўжаева моҳир ҳунармандлардан бири. Унинг қўл меҳнати асосида тайёрланаётган гилам, каштачилик, миллий либослар нафақат ички бозорда, балки хорижда ҳам харидоргир.

Айни кунларда мазкур миллий ҳунармандчилик маҳсулотлари Туркия, Германия ва Францияга экспорт қилинмоқда. Наргиза юзлаб хотин-қизларга ҳам бу ҳунарини ўргатмоқда. 100 нафар аёлларни эса касаначи сифатида ишга қабул қилган. Шунингдек, у бир қатор хорижий давлатларда бўлиб ўтган фестивал ва кўргазмаларда иштирок этиб, ғолиб бўлган. Наргиза Шерхўжаева “Ҳудуднинг 100 нафар ихтирочи аёли” ҳафталиги доирасида ўтказилган “Ихтирочи аёл – 2022” кўрик-танловининг Фарғона вилояти босқичида ғолиб бўлди.  

– Касб-ҳунарга эга бўлган аёл жамиятда ҳам, оилада ҳам ўз ўрнини топади, – дейди у. – Миллий ҳунармандчиликни ўрганиб, кам бўлмадим. Бугунги кунда йўқолиб бораётган ипак матоларининг нусхасини тиклаш ҳаракатидамиз. Дарҳақиқат, Фарғонада бўлиб ўтган мазкур танлов турли соҳаларда фаолият юритиб, истиқболли ғояларини ҳаётга татбиқ қилишга интилаётган юзлаб фаол хотин-қизларни бир майдонга жамлади.  

Танловда вилоят оила ва хотин-қизлар бошқармаси бошлиғи ўринбосари Гулнора Жўраева ва бошқалар мамлакатимизда хотин-қизлар илм-фан соҳасида ҳам фаол эканлигини қайд этиб ўтди. Иштирокчилар 10 та номинация бўйича ўз билим ва маҳоратини синовдан ўтказди.  

Тақдим этилган барча лойиҳалар экспертлар кенгаши аъзолари томонидан ўрганиб чиқилиб, ғолибларга танловнинг республика босқичига йўлланмалар берилди. 

М.Сулаймонов, ЎзА