Фарғоналик уста-ҳунармандлар ёғоч ўймакорлиги, зардўзлик, заргарлик, миллий либослар, кулолчилик, кандакорлик, наққошлик каби кўплаб йўналишларда фаолият кўрсатмоқда. Айниқса, қўл меҳнати билан ясалган ҳунармандчилик маҳсулотларига хорижда ҳам қизиқиш катта.

Халқ амалий санъатида металлдан ясалган бадиий буюмларга бўртма усулда ишлов бериш, яъни кандакорлик ҳунари муҳим ўрин эгаллайди. Бу санъат қадимий бўлиб, бугунги кунда янги анъаналар билан янада тараққий этмоқда. Кандакорлик – сермашаққат ҳунар. Қунт, сабр-тоқат, идрок, билим, зийраклик, қатъият, нозик дид, эпчил қўл, маҳорат, теран мушоҳада –буларнинг барчаси занжирдек бирлашсагина санъат асари намунаси яратилади.  

Қўқонда азалдан кандакорлик мактаби яратилган ҳамда мисгарлик буюмлари шакли ва қиёфаси билан бошқаларга нисбатан ранг-барангроқ бўлган. Ўймакорлиги ўзининг саёз, аммо ғоят аниқ ижро этилиши билан яққол фарқланади. Гулнусха Қўқон ва Марғилон нақшлари имкони борича майда гулларга тўлдириб ишланган. Бу ердаги кандакорлик маҳсулотларида усталарнинг ўзига хос услубини тезда илғаб олишингиз мумкин. 

[gallery-6568]

Қўштепа туманилик Акрамхон Юнусов моҳир мисгар-кандакорлардан бири. У яратган кандакорлик ишлари ноёб санъат намуналари сифатида нафақат юртимиз, балки хорижий мамлакатларда ҳам санъат ихлосмандлари эътиборига тушган. Устанинг хонадонидаги мўъжазгина устахонасида доимо иш қизғин. Кандакорлик маҳсулотлари қўл меҳнати билан ясалади. Ундаги ҳар бир нақш, тасвир ва безаклар бетакрор бўлиб, оҳанрабодек ўзига тортади. Совғабоп офтоба, патнис, чой идиш, кўза, қумғон, самовар қути каби кандакорлик буюмларини юртимизга келган сайёҳлар катта қизиқиш билан харид қилади. 

Акрамхон аканинг мазкур ҳунар билан шуғулланаётганига ўн беш йилдан ошди. Марғилондаги усталарга шогирд тушди, кандакорликни қунт билан ўрганди. Бугунги кунда у моҳир уста сифатида тилга тушган. Вилоятда ўтказилаётган ҳунармандлик кўргазмалари, тадбирларда иштирок этиб, меҳнати эътироф этилмоқда. Уйида кандакорлик маҳсулотлари музейини ташкил этган.  

– Бу қадимий ҳунарнинг нозик сирлари жуда кўп, – дейди А.Юнусов. –Оддий бир металлни санъат асарига келтиришни ўзи машаққат. Кандакорлик буюмларига чекилган нақшлар ва тасвирлар ҳар бир кишини ҳайратга солиши табиий. Ҳозирги кунда фарзандларим – Муҳаммадали ва Муҳаммадюсуф ҳам бу ҳунарни ўрганяпти. Кандакорлик шуҳратини янада кўтаришни мақсад қилганман. Ўз қўлим билан ясаган кандакорлик маҳсулотларини санъат музейида кўргазмага қўйилишини жуда истайман.  

Айни кунларда уста Қўқон шаҳрида бўлиб ўтадиган иккинчи Халқаро ҳунармандчилик фестивалида иштирок этиш учун катта тайёргарлик кўрмоқда. 

М.Сулаймонов, М. Қодиров (сурат),   ЎзА