ФОТОРЕПОРТАЖ

Шарқий ҳарбий округ қўшинлари Фарғона гарнизонидаги ҳарбий қисмда Ўзбекистон Республикаси мудофаасига кўмаклашувчи “Ватанпарвар” ташкилоти билан ҳамкорликда “Шунқорлар” ҳарбий-спорт ўйинларининг  вилоят босқичи ўтказилди.  

Унда вилоят маҳаллаларидан “Ёшлар дафтари”да рўйхатда турувчи 17 ёшдан 22 ёшгача бўлган 170 нафар ўғил-қиздан ташкил топган 17 жамоа тегишли шартларда беллашди.

[gallery-12236]

Шундай қилиб, ҳарбий-ватанпарварлик йўналишида жамоа аъзоларининг Ўзбекистон тарихига доир билимлари текширилди. Ҳарбий-амалий кўпкурашда жамоалар пневматик қуролдан ўқ отиш, ўқув гранатасини узоқликка улоқтириш ва ҳарбийлаштирилган эстафета бўйича баҳслашдилар. Сўнг дуатлон, 100 метрга югуриш, турникда тортилиш бўйича ўзаро куч синашди.

Шиддатли ва муросасиз кечган ҳарбий-спорт ўйинларида Данғара туман жамоасининг қўли баланд келиб, биринчи ўринни эгаллади. Ушбу жамоа Ўзбекистон Республикаси мудофаасига кўмаклашувчи “Ватанпарвар” ташкилоти Марказий кенгаши раисининг кўчма кубоги учун кечадиган беллашувда қатнашиш ҳуқуқини қўлга киритди.

2-ўрин ва 3-ўринлар Ўзбекистон ҳамда Бешариқ туманлари жамоаларига насиб этди. Шунингдек, “Энг яхши спортчи”, “Энг яхши мерган”, “Энг яхши билимдон” номинациялари бўйича ҳам иштирокчилар якка тартибда тақдирланди.

Муқимжон ҚОДИРОВ(сурат),ЎзА