Болалар мўжиза кутиб яшайди. Янги йилда эса ғаройиб саргузаштлар, совғалар унинг орзуси. Лекин уларнинг интиқиб кутадигани – шубҳасиз Президент арчаси, Президент номидан оладиган совғалардир.

Фарғонада ҳам анъанавий “Президент арчаси” байрами шоду хуррамликда ўтди. Дастлаб вилоят ҳокими Ҳайрулло Бозаров уларнинг ҳар бири қаршисига келиб Президент номидан табриклади, улар юборган совғаларни топширди.

— Янги йилдан эзгу ниятлар кутамиз, — дейди Робияхон Мирзатуллаева. — Менимча фақат Ўзбекистонимиздагина шунақа  байрамлар бўлади, биз дўстлашган бошқа мамлакат болалари билан гаплашиб билдимки, Ўзбекистон бу соҳада ҳам ягона.

Улкан Санъат саройи бир лаҳзада эртаклар мамлакатига айланди. Болаларнинг севимли қаҳрамонлари уларни ҳам жалб қилган холда қизиқ ҳангомаларни намойиш қилдилар.

— Президентимизга ҳаммаси учун катта раҳмат, — дейди Шерзодбек Аъзамов. —Гарри Потер, Донохон каби эртак қахрамонларини учратдим. Менга жуда ёқди. Эртаклар ўзи яхшиликка етаклайди ва эзгуликка чорлайди.

Президент эътибори ва эъзози болажонлар қалбидан чуқур ўрин олди. Бу кун уларнинг ҳар бири учун унитилмас кун сифатида хотираларида қолади. Яна янги йил келишини, Президент арчасини соғиниб қоладилар.

<iframe width="650" height="420" src="https://www.youtube.com/embed/-l9jnN4xhtc" title="Fargʻonada “Prezident archasi”" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Муҳаммаджон Обидов, Элёр Олимов (видео), ЎзА