Фуқаролар давлат чегаралари орқали ҳаракатланаётган вақтларида ҳеч қачон бошқа шахсларга тегишли бўлган сумка, товарлар ва шу каби буюмларни чегара орқали олиб ўтиб бериш бўйича ҳар қандай таклифларга қатъий рад жавобларини беришлари керак.

Лекин фуқаролар томонидан кимгадир ёрдам бериш ёки қандайдир моддий манфаат эвазига бу каби ҳолатларга йўл қўйилмоқда. Бунинг оқибатида ўзлари айбсиз “айбдор”га айланиб қоляпти.

Фарғона вилояти божхона бошқармаси ахборот хизматининг хабар беришича, “Ўзбекистон” чегара божхона пости орқали Ўзбекистон Республикасига кириб келаётган фуқаро Ҳ.Б. қўшни давлатдан бегона бўлган шахснинг илтимосига кўра, унга тегишли бўлган газ печини олиб ўтиб беришга ёрдамлашади.  Божхона постидан кўтариб олиб ўтаётган вақтида, газ печининг ички қисмлари олиб ташланиб, унинг ўрнига 2 дона травматик қурол ва 96 дона унинг патронларини усталик билан яширилганлиги аниқланди. Мазкур ҳолат юзасидан фуқаро Ҳ.Б. унинг учун бу бир умрлик дарс бўлганлигини ва қилган хатосини қайта такрорламаслигини таъкидлади.

Ҳозирда мазкур ҳолат юзасидан божхона органлари томонидан суриштирув ҳаракатлари давом эттирилмоқда.

Бундан ташқари, Фарғона вилояти божхона бошқармаси контрабандага қарши курашиш, божхона аудити бўлими ва божхона постлари томонидан олиб борилган тезкор тадбирлар ҳамда божхона назорати натижасида 2020 йил давомида жами 851 та божхона қонун бузилиш ҳолати аниқланиб, тегишли тартибда расмийлаштирилди. Улар бўйича жами 34,2 миллиард сўм миқдоридаги сифати кафолатланмаган ва тегишли ҳужжатлари бўлмаган товар-моддий бойликларининг мамлакатимизга ноқонуний йўллар билан кириб келиши, айланиши ва сақланишига чек қўйилган. Бу ишларнинг самараси сифатида ҳалол тадбиркорлик муҳитининг издан чиқиши ва инсон саломатлигига салбий таъсир қилиши мумкин бўлган зарарларнинг олди олинди.

Тегишли таркибий тузилмалари томонидан олиб борилган ҳуқуқбузарликларнинг олдини олишга қаратилган чора-тадбирлар натижасида ўтган йил давомида 2019 йилга нисбатан божхона қонун бузилиш ҳолатлари сони 267 тага камайтирилган.

Тадбиркорлар томонидан божхона соҳасида товарларни импорт қилиш жараёни анча соддалаштирилди. Бундан ташқари, тадбиркорлар томонидан товар-моддий бойликлари билан боғлиқ бўлган қонун бузилиш ҳолати содир этилса, улар томонидан давлат бюджетига етказилган зарар қопланган бўлса, уларга ўзларининг товарлари қайтариб берилади.

Ўтган йил давомида тадбиркорлар томонидан божхона қонун бузилиш ҳолати содир этилиб, етказилган зарар қопланганлиги сабабли жами 8,8 миллиард сўмлик товарлар эгаларига қайтарилди. Бу эса тадбиркорлик субъектларининг фаолиятлари тўхтаб қолмаслиги ва ўзларига тегишли хулосаларни чиқариб олишлари учун яхши имкон бўлди.

М. Сулаймонов, ЎзА