ФОТОРЕПОРТАЖ

Фарғона вилоятида қишлоқ хўжалигини ривожлантириш ва сув ресурсларидан самарали фойдаланиш мақсадида ирригация инфратузилмасини яхшилаш ишлари олиб борилмоқда.

Хусусан, “Сирдарё–Сўх” ирригация тизимлари ҳавза бошқармаси тасарруфидаги канал ва суғориш тармоқларини бетонлаштириш ҳамда реконструкция қилиш ишлари амалга оширилмоқда. Бу сув йўқотишларини камайтириш ҳамда қишлоқ хўжалиги ерларини барқарор сув билан таъминлашга хизмат қилмоқда.

Маълум қилинишича, 2025–2026 йилларда вилоятда 7 та канал ва суғориш тармоқларини реконструкция қилиш режалаштирилган. Ушбу ишлар учун давлат бюджетидан 54 миллиард сўмдан ортиқ маблағ ажратилиб, 50 километрдан зиёд ирригация тармоқларининг сув ўтказувчанлиги яхшиланади. Айни пайтда барча объектларда қурилиш-таъмирлаш ишлари белгиланган меъёрлар асосида олиб борилмоқда, зарур техника ва ишчи кучлари тўлиқ сафарбар этилган.

[gallery-27419]

Жумладан, Бувайда ва Учкўприк туманларидаги фермер ва аҳоли томорқаларини сув билан таъминлаб келаётган Картан каналида реконструкция ишлари амалга оширилмоқда. Умумий қиймати 29 миллиард сўм бўлган лойиҳа доирасида каналнинг 19,1 километр қисми бетонлаштирилмоқда. Лойиҳа якунлангач, икки тумандаги 3830 гектар суғориладиган ер майдонлари барқарор сув билан таъминланади.

Объектда 17 та экскаватор, 13 та махсус техника ва 150 нафар ишчи-ходим жалб этилган. Шу кунга қадар 7 километр ер ишлари ҳамда 3 километр бетонлаштириш ишлари бажарилган.

Муқимжон ҚОДИРОВ (сурат), ЎзА