Мамлакатимизда тадбиркорлик фаолиятини ривожлантириш ва тадбиркорларни қўллаб-қувватлаш мақсадида барча шарт-шароитлар яратилмоқда.

Қишлоқ хўжалиги учун зарур бўладиган минерал ўғитлар ишлаб чиқарилиши ҳамда экспортига алоҳида эътибор қаратилмоқда. Республикамизда минерал ўғитлар етишмовчилигини олдини олиш ҳамда унинг зарурий захиралари яратиш бўйича тизимли ишлар амалга оширилмоқда.

Минерал ўғитларга нафақат ички бозорда, балки хорижда ҳам талаб катта. Ҳукуматимиз томонидан мамлакатимизда умумий ишлаб чиқариладиган минерал ўғитларнинг қишлоқ хўжалигида йил давомида фойдаланишдан ортган қисмини экспорт қилиш тартиби ишлаб чиқилган. Бунда асосий эътиборни минерал ўғитлар танқислигини олдини олишга қаратилган.

Божхона соҳасида ҳам экспорт товарларининг божхона назорати ҳамда расмийлаштирувидан ўтказиш соддалаштирилмоқда. Бунинг натижасида экспорт товарларининг тўлиқ божхона тартиб таомилларидан ўтиш вақти уч баробарга қисқартирилди. Экспортга йўналтирилаётган товарларнинг 90 фоизи соддалаштирилган тартибда расмийлаштирилмоқда.  

Фарғона вилояти божхона бошқармаси томонидан жорий йилнинг ўтган олти ойи давомида умумий қиймати 400,5 миллион долларлик товарлар дунёнинг 55 та мамлакатига экспортга расмийлаштирилган. Ушбу кўрсаткич ўтган йилнинг мос даврига нисбатан 20,4 фоизга ёки 69,6 миллион долларга органини кўришимиз мумкин. 
Экспорт товарларининг 314,7 миллион долларини ёки 76 фоизини саноат маҳсулотлари ҳамда 85,8 миллион долларини ёки 24 фоизни мева-сабзавот маҳсулотлари ташкил этди. Асосий экспорт товарлари қаторидан калава ип, тўқимачилик маҳсулотлари, озиқ-овқат маҳсулотлари, қишлоқ хўжалиги товарлари, оёқ кийимлар, керамика буюмлари, металлар ва улардан ясалган товарлар ташкил этди.

Вилоятнинг умумий экспортида катта улушга эга бўлган товарлардан бири минерал ўғитлардир. Жами вилоят экспортининг деярли 6 фоизини оғирлиги 76,7 минг тоннага тенг бўлган 18,8 миллион долларлик минерал ўғитлар ташкил этмоқда. Вилоятдан минерал ўғитлар Туркманистон, Руминия, Хитой, Афғонистон, Монголия ва Польша каби давлатларга экспорт қилинди. Экспорт қилинаётган минерал ўғитларнинг 78 фоизга тенг бўлган 67,3 минг тонна қисми  айнан Туркманистонга тўғри келади.

Экспорт қилинган минерал ўғитларнинг 9,7 миллион долларга тенг бўлган 53,5 минг тонна қисми бошқарманинг “Қиргули” ташқи иқтисодий фаолият божхона пости ходимлари томонидан божхона назоратидан ўтказилиб расмийлаштирилган. Бугунги кунда барча божхона юк декларациялари масофавий тарзда рамийлаштирилиши билан бир вақтда товарларнинг божхона назоратидан ўтказилиши ҳамда юк кузатув ҳужжатлари расмийлаштирилиши ташқи иқтисодий фаолият божхона постлари томонидан амалга оширилмоқда. Бу борада “Қиргули” ташқи иқтисодий фаолият божхона пости ходимлари тадбиркорлар томонидан сутканинг ҳар қандай вақтида қилинган мурожаатлари ҳамда экспортга йўналтирилаётган товарлари тезкорлик билан божхона назоратидан ўтказилиши таъминланмоқда.

М.Сулаймонов, ЎзА