Иқтисодий тадқиқотлар ва ислоҳотлар маркази томонидан тақдим этилган Фарғона водийсининг ижтимоий-иқтисодий ривожланиши бўйича таҳлилига кўра, саккиз йил давомида водийнинг ялпи ҳудудий маҳсулоти (ЯҲМ) жорий нархларда деярли тўрт баробарга ошиб, 7,9 млрд. доллардан 19,8 млрд долларгача етди. Шу даврда реал ўсиш 60 фоизни ташкил этиб, ўртача иқтисодий кўрсаткичдан 56 фоизга ошди.

Ўзбекистон ЯИМда Фарғона водийсининг улуши 17,2 фоизни ташкил этмоқда. Аҳоли сонининг сезиларли даражада 15 фоизга ошганига қарамай, аҳоли жон бошига тўғри келадиган реал ЯҲМ 37 фоизга етди. Иқтисодий тадқиқотлар ва ислоҳотлар маркази томонидан 2020-2024 йилларда Night-Time Light маълумотлари асосида ўтказилган таҳлил натижаларига кўра, мазкур давр мобайнида Фарғона водийсида аҳоли жон бошига тўғри келадиган даромад 68 фоизга ўсиб, 1,8 минг доллардан 3 минг долларга етган.

Тармоқлар таркибий тузилмаси ўзгармоқда. Хизматлар соҳасининг улуши 40,3 фоизгача, саноат ва қурилиш соҳаларининг улуши эса 28 фоизгача ошди. Шу билан бирга, қишлоқ хўжалиги маҳсулотлари ишлаб чиқариши ҳам учдан бир қисмига кўпайди. Водий экспорти 2,7 млрд. долларгача ошиб, 2,4 баробарга кўпайди. Ўзбекистоннинг Қирғизистон ва Тожикистон билан савдо айланмаси 1,6 млрд. долларгача ошиб, уч баробардан зиёдга кўпайди.

2017-2024 йиллар давомида 31,2 млрд. долларлик инвестиция лойиҳалари амалга оширилди ва 975 мингдан ортиқ иш ўринлари яратилди. Камбағаллик даражаси эса 13,9 фоиздан 8,6 фоизгача камайди.

Алоҳида тарзда «умумқамровли» ўсиш инфратузилмасини шакллантираётган лойиҳалар қайд этилди. «Қўқон» эркин иқтисодий зонаси 210 гектаргача кенгайтирилди, 2026 йил охиригача 1 млрд. долларгача инвестиция жалб этиш ва 12 мингта иш ўрни яратиш режалаштирилган.

Наманган ва Андижонда аэропортлар ва юк ташиш марказлари (карго-узеллар) модернизация қилинмоқда, янги ишлаб чиқариш майдонлари ва туристик кластерлар ривожланмоқда. Бу эса логистика харажатларини камайтиради ва минтақа экспорт салоҳиятини мустаҳкамлайди.

Моҳигул Қосимова, ЎзА