“Сўнгги йилларда” деган ибора ОАВда энг кўп қўлланаётган бирикма бўлиб қоляпти. Дарҳақиқат, ҳар соҳада рўй бераётган юксалиш сўнгги йиллар ҳиссасига тўғри келмоқда.

Масалан, Фарғона вилоятида 2024 йилнинг ўн ойи якуни бўйича, экспорт маҳсулотлари миқдори 698,9 млн. АҚШ долларига етди. Йил якуни  бўйича эса бу рақам 850-900 млн. долларга етиши кутилмоқда.

Энди таққослаб кўринг. 2016-2017 йилларда вилоят экспорти 200-300 млн. доллар оралиғида эди.

Бундай ўсиш (икки ярим баробар)га сўнгги йилларда эришилди. Унинг сабаблари нимада?  

Биринчидан, сўмнинг хорижий валютага эркин конвертацияси очилди.

Иккинчидан, тадбиркорлик фаолиятини кафолатли ҳимоя қилувчи ва қўллаб-қувватловчи қонунлар яратилди.

Учинчидан, Ўзбекистонга келадиган замонавий технология оқими кескин ортди.

Тўртинчидан, мамлакат бошқарувида, ижро ҳокимиятида тадбиркорлик фаолияти  ва ишлаб чиқаришни  текшириш чекланди.

Натижа шуки, биргина Фарғона вилоятида экспортёрлар сони 701 тага етди.

Илгари пахта толасини экспорт қиладиган Фарғона вилояти 2024 йил январ-октябр ойларида 241,9 млн. АҚШ долларига тенг тўқимачилик маҳсулотларини экспорт қилди ва бу ўтган йилнинг шу даврига нисбатан 2,7 фоизга кўпдир. Энди пахта толаси эмас, пахта ипи, трикотаж мато, тайёр трикотаж ва тикувчилик кийимлари, жами 135 турдаги тўқимачилик маҳсулотлари дунёнинг 43 та давлатига экспорт қилинмоқда.

Бундай кўрсаткичларга, такрор бўлсада айтамиз, сўнгги йилларда эришилмоқда.

Муҳаммаджон Обидов, ЎзА