Бугунги кунда Фарғона вилоятидаги 18 ёшдан 30 ёшгача бўлган 703 минг нафар ёшнинг 81 минг нафари ишсиз. 35 минг нафари эса хорижга чиқиб кетган. Шу боис уларнинг бандлигини таъминлаш, касб-ҳунарга ўргатиш муҳим вазифалардандир.

Бунинг учун ҳудудларда катта имкониятлар бор. Раҳбарлар мазкур масалада бефарқ бўлмасдан ёшларни иш ва даромад билан таъминлаш чораларини кўриши зарур бўлади. Фарғона шаҳрида ишсиз аҳолига хизмат кўрсатувчи “Ишга марҳамат” мономаркази ҳамда 17 та филиаллари ташкил этилди. Бу ерда 16 та касб ва хорижий тилларга ўқитиш орқали маҳаллий ҳамда хорижий иш берувчиларнинг талабларига мос малакали мутахассислар тайёрланмоқда. Шунингдек, ҳудудларда “Маҳалла аҳолисини касб-ҳунарга ўқитиш маскани” фаолияти йўлга қўйилган.

Бешариқ вилоятнинг чекка тумани бўлиб, 229 минг аҳоли истиқомат қилади. Бу ерда 6 минг 41 нафар ишсиз ёшларнинг рўйхати шакллантирилиб, “Ёшлар дафтари”га киритилди. Сектор раҳбарлари томонидан улар билан тизимли ишлаш чоралари кўрилмоқда.

– Ўтган йилда туманимизда 953 нафар ёшлар учун янги иш ўринлари яратилди, – дейди туман аҳоли Бандлигига кўмаклашиш маркази директори Шарифахон Азизова. – Иш излаётган аксарият йигит-қизларда бирор касб ёки ҳунар бўйича малака етишмайди. Шу боис касб-ҳунарга ўргатиш маркази ташкил этилди. Маҳаллий бюджетдан 215 миллион сўм маблағ ажратилиб, 2-касб-ҳунар мактабидаги 4 та хона жорий таъмирланди. Тикувчилик, авточилангарлик ва электр-газ пайвандчилик йўналишида касб-ҳунарга ўқитиш учун зарур жиҳозлар сотиб олинди. Ўтган йилда туман аҳоли бандлигига кўмаклашиш маркази томонидан тумандаги саноат корхоналари ҳамда якка тартибдаги ҳунармандларнинг талабномалари асосида 201 нафар ишсиз ва иш билан банд бўлмаган фуқаролар касб-ҳунарга ўқитилди. Уларга базавий ҳисоблаш миқдорининг бир баравари миқдорида стипендиялар тўланди. Сертификатлар берилиб, “Люкс-ян текс”, “Шервуд дизайн” масъулияти чекланган жамияти ва бошқа корхоналарга ишга қабул қилинди.  

Ёшларни иш билан таъминлаш учун, аввало, улар ўртасида тадбиркорликни кенг ривожлантириш, бу борада янги имкониятлар яратиш керак. Туманда “Ҳар бир тадбиркор – ёшларга мададкор” тамойили асосида ёшларни тадбиркорликка кенг жалб этиш ва уларнинг бандлигини таъминлашга алоҳида эътибор қаратилмоқда. “Ёшлар дафтари”да рўйхатда турган, тадбиркорлик фаолияти билан шуғулланмоқчи бўлган 25 нафар ишсиз ёш иштирокида тадбиркорлик йўналиши бўйича 48 соатлик семинар-тренинг ўтказилди. Айни кунларда улар тадбиркорликни йўлга қўйиш ҳаракатида.

Ҳозирда касб-ҳунарга ўргатиш марказида 60 нафар ишсиз фуқаро автомобилларга техник хизмат кўрсатиш чилангари, тикувчилик, иссиқхона ва электрогаз пайвандловчи йўналишлари бўйича касб-ҳунарга ўқитилмоқда.  

– Марказдаги тикувчилик йўналишида ўқияпман, – дейди “Бой” маҳалла фуқаролар йиғинида яшовчи Лутфия Иқболова. – Биз каби ишсиз ёшларга имтиёзли субсидиялар берилишини эшитиб, бизнес ғоя устида иш олиб боряпман. Тикувчилик цехини ташкил қилмоқчиман. Ҳунар инсон учун доимо керак. Айниқса, уйда ўтирган қизларга даромад топишида жуда асқатади.  

Бундан ташқари тумандаги 1-сонли касб-хунар мактабида авточилангарлик, электр-газ пайвандчи, сантехник, элекромонтёр, тикувчилик, компьютер инжиниринги ва қандолатчилик йўналишларида ишсиз ёшлар касб-ҳунарга ўқитиш йўлга қўйилмоқда.

М.Сулаймонов, ЎзА