Фарғона вилоятининг хорижий ва миллий валютадаги узоқ муддатли кредит рейтинги “B+” даражадан "BB-" га кўтарилди.
Ўзбекистонда яратилган қулай инвестициявий муҳит, хорижлик инвесторларга берилаётган кенг қамровли имтиёз ва кафолатлар Фарғона вилоятида ҳам ўз самарасини бермоқда. Мазкур ислоҳотлар натижасида вилоят ўзининг инвестициявий жозибадорлигини яна бир марта оширди.
Вилоятдаги бу каби ишлар халқаро майдонда эътироф этилаётган бўлиб, 2025 йилнинг 28 ноябрь куни S&P Global Rating томонидан эълон қилинган рейтинг кўрсаткичи буни яққол исботлади. Хусусан, вилоятнинг иқтисодий ва инвестициявий салоҳияти дунёнинг энг нуфузли S&P Global Rating (АҚШ) халқаро рейтинг агентлиги томонидан таҳлил қилиниб, мустаҳкам молиявий индикаторлари ва юқори иқтисодий салоҳияти учун "B+" дан "BB-" га кўтарилди.
Янги ҳисоботда Фарғона вилояти бюджетининг юқори ўсиш кўрсаткичлари ҳамда тижорий қарздорликнинг мавжуд эмаслиги ва қарздорлик даражаси нолга тенг экани натижасида вилоятнинг ликвидлик кўрсаткичлари юқори барқарорликни сақлаб қолиши алоҳида эътироф этилди. Ижобий халқаро рейтинг кўрсаткичига эришишда вилоятда фаол ўзлаштирилаётган хорижий инвестициялар ҳажми ва жадал ташқи савдо динамикаси ижобий таъсир кўрсатди. Шу ўринда таъкидлаш керак, Фарғона вилоятига жалб этилган тўғридан-тўғри хорижий инвестициялар ҳажми йилдан йилга ошиб бормоқда.
Ишонч билан айтиш мумкинки, S&P Global Rating халқаро рейтинг агентлиги томонидан Фарғона вилоятига берилган "BB-" даражаси вилоятга инвесторлар ва бошқа молия ташкилотларини янада кенг жалб қилиш, кириб келаётган инвестициялар оқимини жадаллаштиради.
Агентликнинг рейтинг ва индекслари орқали вилоятнинг макроиқтисодий сиёсати ва кўрсаткичлари ҳақида очиқ маълумотлар тақдим этилганлиги инвесторлар учун вилоятга инвестиция киритиш бўйича қарор қабул қилиш жараёнини осонлаштиради ва йирик инвестицион лойиҳаларни амалга ошириш учун кенг имкониятлар эшигини очади.
Маълумот учун, S&P томонидан Фарғонага B+ даражасидаги “Барқарор” прогнозли кредит рейтинги илк бор 2022 йил 3 июнь куни берилган эди.
М.Сулаймонов, ЎзА