Қорақалпоғистон Республикаси Жўқорғи Кенгеси, Вазирлар кенгаши раислари, вилоят ҳокимлари, ўринбосарлари, республика ташкилот ва идоралари, тижорат банклари раҳбарлари Фарғона вилоятида бўлди.

Президентимизнинг жорий йил 12-13 май кунлари Фарғона вилоятига ташрифи давомида берилган топшириқларга асосан меҳмонлар вилоятдаги йирик инвестицион лойиҳалар, янги иш ўринлари яратиш, маҳаллабай ишлаш, боғдорчилик ва узумчилик соҳаларини ривожлантириш бўйича амалга оширилаётган ишлар билан танишди.

Дастлаб, Фарғона шаҳридаги “Fergana Global Textile” корхонаси фаолияти ўрганилди. Корхона раҳбари Музаффар Раззоқов лойиҳа қиймати 71 миллион евро бўлган ушбу корхона фаолияти ҳақида маълумот берди. Ўтган йилда мустақиллик байрами арафасида ишга туширилган бу фабрика йилига 13,5 минг тонна ип-калава ҳамда 9 миллион метр юқори сифатли мато ишлаб чиқариш қувватига эга. Бугунги кунда 2 200 нафар ишчи-ходим фаолият кўрсатмоқда. “Fergana Global Textile” корхонаси томонидан йилига 486 миллиард сўмлик маҳсулот ишлаб чиқарилиб Украина, Россия, Хитой, Туркияга 25 миллион долларлик экспорт амалга оширилмоқда.

Марғилон шаҳрида ташкил этилган Ёшлар саноат ва тадбиркорлик зонаси фаолияти билан танишув уларда катта қизиқиш уйғотди. Илгари тошлоқ, фойдаланилмайдиган ер бўлган бу ҳудудда 7 гектар майдонда саноат зонаси ташкил этилди. Бу ерда тўқимачилик, чарм-пойабзал, мебелсозлик, озиқ-овқат саноати бўйича 28 та лойиҳа жойлаштирилган. Бугунги кунда уларнинг 12 таси ишлаб чиқариш фаолиятини бошлаган. Барча корхоналарда мингдан ортиқ иш ўрни яратилади.

Меҳмонлар Олтиариқ туманида Катпут ММТП ҳудудидаги минг гектар адирликда ташкил этилган узумчилик ва боғдорчилик плантацияси билан ҳам танишди. Авваллари бу жой ҳеч нарса экилмайдиган қуруқ ер эди. Сув таъминотини етарли йўлга қўйиш учун 12 та тик суғориш қудуқлари қазилди, сув ҳовузлари барпо этилди, томчилаб суғориш тизими жорий этилди, насослар ўрнатилди, электр тармоғи тортилди. Ўзлаштирилган майдонларнинг 560 гектарида бетон устунлар ўрнатилиб, токзор барпо этилди, “ҳусайни”, “келинбармоқ”, “ризамат”, “кишмиш” каби харидоргир узум навлари экилди. Бу узумзорлар аҳолига 25 сотихдан 25 миллион сўмлик 7 йиллик имтиёзли кредит асосида бўлиб берилмоқда. 300 гектарлик интенсив боғда эса олма, гилос, ўрик кўчатлари ўтқазилмоқда. Қатор ораларига тарвуз экилган. Бозор талабига қараб, қалампир, булғор қалампири, бодринг, кўкатлар ва бошқа полиз маҳсулотлари етиштирилади.

Тадбирда нишаб адирликдаги узумзор ва боғларда ўрнатилган автомат суғориш, органик ўғитлаш тизимлари, шунингдек, бундай лойиҳаларда таъминотчилар, фуқароларни кредитлаш жараёнлари ҳақида маълумот берилди. Мева-сабзавот логистикаси соҳасида фаолият юритувчи маҳаллий тадбиркорлар ўз тажрибалари билан ўртоқлашди.

Кейинги ташриф Риштон тумани Навоий маҳалласида жойлашган собиқ “Бадиий кулолчилик заводи” негизида ташкил этилган Кулолчилик маҳсулотлари саноат зонасига бўлди. Ихтисослашган саноат зонасида умумий лойиҳа қиймати 75,8 миллиард сўм бўлган 37 та чинни ва керамика буюмлари ишлаб чиқариш ва безак бериш корхонаси ташкил этилган бўлиб, 7200 дан зиёд иш ўрни яратилган. Меҳмонлар ишлаб чиқариш жараёнлари билан танишиб, тадбиркорлар билан мулоқот қилди.

Учкўприк туманида 15 гектар майдонда бунёд этилган Енгил саноат ва логистика маркази ҳам кўздан кечирилди. Трикотаж маҳсулотларига ихтисослашган ушбу мажмуа 316 та ишлаб чиқариш цехи, 336 та савдо дўкони, 560 та савдо растаси, шунингдек, 2 та логистика марказидан иборат. 2021 йил ноябрь ойида қурилиш ишлари бошланган мажмуа қисқа муддатда қуриб битказилиб, 7 минг 700 дан ортиқ фуқаро доимий иш ўрнига эга бўлди.

Меҳмонлар Бувайда туманининг “Қўнғирот” маҳалла фуқаролар ҳудудида эски боғлар ўрнида жами 22 гектар майдонда барпо этилаётган мебелчиликка ихтисослашган йирик савдо ва ишлаб чиқариш мажмуаси билан ҳам танишди. Бувайдада кўпчилик уста-дурадгор. Оилалар ўз уйида эшик-ромлар тайёрлаб сотади. Уларнинг маҳсулотлари Фарғона водийсидан ташқари Тошкент шаҳри, узоқ вилоятларгача етказиб берилади. Лекин ҳовлида шароитлар етишмасди. Об-ҳаво, шовқин ноқулайлик туғдирарди. Бувайдалик ҳунармандларга қулай шарт-шароитлар яратиш мақсадида ушбу мебелсозликка ихтисослашган мажмуа барпо этилди. Бир қаватли биноларда ишлаб чиқариш устахоналари, икки қаватли биноларда савдо, кўргазма ва маиший хизмат хоналари жойлашган.

Қува туманида “Қорақум” маҳалласидаги “Улуғ мақсад гуллари” гулчилик кооперацияси фаолияти билан танишди, атиргулчилик билан шуғулланувчи хонадонларда бўлди. Бу ерда гулчилик кооперацияларини ташкил этиш ва аукцион орқали аҳолига бириктириб бериш тизими, шунингдек, атиргул уруғи, кўчатлари ва ниҳолларини етиштириш, парваришлаш агротехникаси ҳақида маълумот берилди. Бу йил тумандаги 281 гектар ер майдонларда гул кўчатлари етиштириш режалаштирилган. Ҳозиргача ушбу ер майдонларининг 168 гектарига атиргул уруғи, 81 гектарига атиргул ниҳоллари, 32 гектарига атиргул кўчатлари экилиши таъминланиб, 5 та атиргулчилик кооперацияларига бириктирилди. Бир гектар атиргулдан йиллик 600 миллион сўмдан зиёд соф фойда олиш мумкин.

Қувасой шаҳрида “Uz Segang” масъулияти чекланган жамияти томонидан 500 гектар майдонда амалга оширилган “Замонавий боғ ва томчилатиб суғоришни ташкил этиш” лойиҳаси ҳам меҳмонларда катта таассурот қолдирди. Қиймати 44 миллиард сўм бўлган ушбу лойиҳа доирасида 500 гектар боғ плантациялари ташкил этилган бўлиб, шундан 450 гектар майдонда гилос, 20 гектар шафтоли ва 30 гектар ўрик боғлари ўрин олган. Боғ ҳудудида томчилатиб суғориш тизими жорий қилинган.

Фарғона шаҳрида “Янги Ўзбекистон” массивининг қурилиш майдонига ҳам бориб кўрилди. 300 гектарли ушбу массивда 298 та кўп қаватли уй қурилиши режалаштирилган. Шундан 80 таси бу йил тадбиркорлар томонидан барпо этилади. Шунингдек, иккита умумтаълим мактаби, учта мактабгача таълим ташкилоти, тиббиёт муассасалари, савдо ва маиший хизмат шохобчалари, спорт мажмуаси ва масжид қурилади. 50 гектарда ташкил этиладиган кичик саноат зонаси аҳолини иш билан таъминлашда муҳим ўрин тутади. Массив ўртасидаги 70 гектар майдонда “Янги Ўзбекистон боғи” ва сунъий кўл ташкил этилади. Ҳозирданоқ 10 минг тупдан зиёд дарахт кўчатлари ўтқазилган. Жами 21 минг туп экилиши режалаштирилган.

[gallery-7220]

Бугунги кунда вилоятда барча соҳаларда ана шундай истиқболли лойиҳалар амалга оширилмоқда. Бу Фарғона тажрибаси сифатида эътироф этилиб, мамлакатимизнинг бошқа ҳудудларида ҳам оммалаштириш чора-тадбирлари белгиланган.

Тадбирда Ўзбекистон Республикаси Бош вазири ўринбосари Ш.Ғаниев, Фарғона вилояти ҳокими Х.Бозоров иштирок этди.

М.Сулаймонов, М.Қодиров (сурат), ЎзА