Мамлакатимизда ёшлар жамиятнинг энг муҳим ва истиқболли қатлами сифатида эътибор марказида турибди. Бугунги ислоҳотлар жараёнида уларнинг билимли, соғлом, юксак маънавиятли ва замонавий дунёқарашга эга шахслар бўлиб вояга етиши учун барча шароит яратилмоқда.

Фарғона шаҳрида очилган “Ёшлар маркази” ҳам шу йўлдаги муносиб қадам бўлди, дейиш мумкин. Тантанада сўзга чиққан Фарғона вилоят ҳокими Хайрулло Бозоров ёшлар АТ ва инновацион услубларга асосланган ҳолда ўқиши, касб-ҳунар ўрганиши замон талаби экани ва янги қурилган “Ёшлар маркази” ана шу талабларга жавоб берадиган маскандир, деди.

Сўз олган фахрий ва ёшларнинг вакиллари Ўзбекистон келажаги муносиб авлодлар қўлида эканини ва бу марказ ёшларнинг энг севимли жойи бўлиб қолишини таъкидлашди.

[gallery-24985]

“Ёшлар маркази” эшикларини очди. Бу ерда болалар ва ёшлар ҳар тарафлама билим ва кўникма орттириш учун барча шароит яратилган эди. Компьютер хоналари, интеллектуал билим мусобақалари майдони, кинотеатр, спорт заллари, анжуманлар зали ва баҳс-мунозара учун давра, қўйингки, истак ва иқтидор намоён бўлиши учун зарур ҳар қандай имконият мавжуд. Ҳар бир йўналишда тажрибали мураббийлар ёшлар билан шуғулланади.

“Ёшлар маркази”да шу бугун биринчи оммавий тадбир ҳам ўтказилди. Фарғона шаҳар ҳокимлиги 200 нафар кам таъминланган ва ёш оила фарзандлари учун хатна тўйи қилиб берди. Дастурхон ёзилиб уларнинг оилалари ва маҳалла аҳлига эҳтиром кўрсатилди. Болажонларга эса велосипедлар совға қилинди.

<iframe width="640" height="480" src="https://www.youtube.com/embed/-H8cMtPbXEE?si=2EWRggWhvKPOuUND" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов (видео,сурат), ЎзА