Ипакчилик ва жун саноатини ривожлантириш қўмитаси раиси Иқболжон Эргашев Тошкент вилояти Бекобод туманида пиллачилик бўйича амалга оширилаётган ишлар билан танишди.

Маълумки, пиллачилик мамлакатимиз иқтисодиётининг муҳим тармоғи, енгил саноатнинг муҳим хомашёси ҳамда қишлоқ хўжалигининг даромадли соҳаларидан бири ҳисобланади. Шу боис ҳам юртимизда пиллачиликни ривожлантириш, сифатли пилла етиштириш масаласига алоҳида эътибор қаратилади.  

Сара ва сифатли “кумуш тола” етиштиришда ўзига хос тажрибага эга пиллакорларимиз жорий йил баҳорги мавсумда 466 минг 563 қути ипак қурти парваришлаб, 30 минг тоннадан ортиқ пилла хомашёси етиштиришни режалаштирган.  

Пиллакорлар билан учрашувда Президентимизнинг жорий йил 3 майдаги “Пилла етиштириш ва ипакчилик соҳасида бозор механизмларини жорий қилишни жадаллаштириш бўйича қўшимча чора-тадбирлар тўғрисида”ги фармонида белгиланган мақсад ва вазифалар хусусида сўз борди. Ипак қуртининг маҳаллий зотларини яратишни paғбатлантириш, сифатли ипак ишлаб чиқариш, уни қайта ишлаш даражасини ошириш ва қўшилган қийматли тайёр маҳсулот ишлаб чиқариш учун қулай шароитлар яратиш бўйича фикр алмашилди.  

Қайд этилганидек, жорий мавсумда пиллакорларга ҳар килограмм пилла учун 40 минг сўмдан, режадан орттирилган ҳар килограмм учун қўшимча 50 минг сўмдан мукофот пули берилади.  

Учрашув сўнгида қўмита раиси томонидан фаол пиллакорлар меҳнати муносиб рағбатлантирилди.  

Гулноза Бобоева, ЎзА