“Би-Би-Си” хабарига кўра, “Евровидение-2023” “Bitlz” гуруҳининг ватани – Ливерпуль шаҳрида бўлиб ўтади.

Мазкур мусиқий мусобақа қоидасига мувофиқ, навбатдаги танлов амалдаги ғолибнинг юртида бўлиб ўтиши керак. Охирги марта Украина вакили бош совринни олган. Европа телерадиоэшиттириш иттифоқи эса хавфсизлик нуқтаи назаридан тадбирни бошқа давлатда ўтказиш бўйича қарор қабул қилди. Танловни ўтказиш Буюк Британияга берилган, чунки “Евровидение” танловида сўнгги бор иккинчи ўринни британиялик мусиқачи эгаллаган.

Британия ўтмишда саккиз марта ушбу анжуманга мезбонлик қилган, бироқ, мусобақа ҳеч қачон Ливерпулда ўтказилмаган.

1956 йилдан бери ўтказиб келинаётган энг машҳур мусиқий тадбирлардан бири сифатида “Евровидение-2023” ўн бир минг томошабинга мўлжалланган “M&S Bank Arena”да бўлиб ўтади.