Собиқ ва амалдаги европалик сиёсатчилар ҳамда Европарламент аъзолари Украина президенти Владимир Зеленскийни 2022 йилда тинчлик учун Нобель мукофоти билан тақдирлаш ташаббуси билан чиқдилар, дейилади nobelprizeforukraine веб-сайтида чоп этилган мактубда.

Хабар муаллифлари Норвегия Нобель қўмитасини номзодларни кўрсатиш тартибини қайта кўриб чиқишга чақирди, чунки аслида аризаларни топшириш муддати аллақачон тугаган. 
“Биз Қўмитага Тинчлик учун Нобель мукофотига номзод кўрсатиш тартибини 2022 йилнинг 31 мартигача узайтириш илтимоси билан мурожаат қиламиз, бунда президент Зеленский ва Украина халқининг Тинчлик учун Нобель мукофотига номзоди кўрсатилишига рухсат берилади”, — дейилади мурожаатда. 

Норвегия Нобель қўмитаси матбуот хизмати хабар беришича, бу йил мукофотга 251 нафар шахс ва 92 ташкилот ариза топширган. 

2021 йилда тинчлик бўйича Нобель мукофоти россиялик журналист ва “Новая газета” бош муҳаррири Дмитрий Муратов ва филиппинлик журналист Мария Рессага берилди. 
Украинанинг собиқ президенти Виктор Януковичнинг сўзларига кўра, Зеленский Донбассда тинчлик ўрнатиш бўйича босқичма-босқич режани, жумладан, тинчлик шартномасини имзолаш, Донбассни қайта тиклаш бўйича халқаро жамғармани ташкил этиш ва якуний сиёсий режани рад этган.