Футбол бўйича Европанинг топ-5 чемпионати чарм тўп ишқибозлари томонидан алоҳида қизиқиш билан кузатиб борилади. Мазкур чемпионатлар баҳор мавсумида ҳал қилувчи паллага киради ва ўйинлар шиддатли ва қизиқарли тус олади.

Мазкур чемпионатлардаги вазиятни шарҳласак. Англия Премьер-лигасининг 28-тури якунига кўра, "Арсенал" клуби 64 очко жамғариб, биринчи ўринда бораётган бўлса, таркибида ҳамюртимиз Абдуқодир Ҳусанов тўп сураётган "Манчестер Сити" жамоаси 59 очко тўплаб, иккинчи ўриндан жой олган. Шунингдек, "Манчестер Юнайтед" ва "Астон Вилла" бир хил 51 очкога эга бўлиб, голлар нисбатига кўра 3-4 поғоналардан жой олган. "Ливерпуль" эса 48 очко эвазига кучли бешликни якунламоқда.

Лиганинг 29-тур учрашувлари 4-6 март кунлари бўлиб ўтади. Унда "Эвертон" – "Бёрнли", "Борнмут" – "Брентфорд", "Лидс Юнайтед" – "Сандерленд", "Вулверхэмптон" – "Ливерпуль",  "Астон Вилла" – "Челси", "Фулҳэм" – "Вест Хэм", "Брайтон" – "Арсенал", "МС" – "Ноттингем Форест", "Ньюкасл" – "МЮ" ва "Тоттенҳэм" – "Кристал Пэлас" жамоалари ўртасидаги ўйинларга гувоҳ бўламиз.

Испания Ла Лигасида 26-тур учрашувлари бугун “Реал” ва “Хетафе” жамоалари баҳсидан сўнг ўз якунига етади. Эътиборли жиҳати, ушбу учрашувда “Реал” ғалаба қозона олса, лигада 64 очко билан карвонбошилик қилаётган “Барселона” билан очколар фарқини биттага етказиб олади.

“Қироллик клуби” "Атлетико Мадрид" ва "Вильярреал" жамоасидан 9 очко илгарилаб кетган. Дарвоқе, Ла Лиганинг кучли бешлигини "Бетис" 43 очко билан якунлаб бермоқда.  

Эслатиб ўтамиз, мусобақанинг 27-тури 6-9 март кунлари бўлиб ўтади.  

Германия Бундеслигасида 24-тур учрашувлари бугун “Гамбург” ва “Байер” жамоалари ўртасидаги баҳсдан сўнг якунланса-да, ушбу баҳс натижаси чемпионатнинг кучли бешлигига таъсир кўрсатмайди.

Айни дамда 25-тур учрашувлари олдидан "Бавария" 63 очко билан 1-ўринни эгаллаб турибди. "Боруссия Д" эса 52 очко эвазига иккинчи ўринни эгаллаган. Ҳисобида 46 очко бўлган "Ҳоффенхайм" ва "Штутгарт" клублари 46, "РБ Лейпциг" 44 очко билан 5-ўринда бормоқда. Дарвоқе, Бундеслиганинг 25-тури 6-9 март санасида ташкил этилади.  

Италия А сериясида "Интер" 27-тур якунига кўра, 67 очко билан пешқадамликни сақлаб қолди ва энг яқин таъқибчиси "Милан" жамоасидан 10 очко ўзиб кетди. Чемпионатнинг учинчи ўрнида "Наполи" 53 очко билан қолган бўлса, "Рома" 51 ва "Комо" 48 очко тўплаб, 4-5 поғоналардан жой олди. А сериянинг 28 тури 6-8 март кунлари бўлиб ўтади.

Франция Лига 1 мусобақасида бу йилги мавсум ҳам Париж шаҳри жамоаси 57 очко билан пешқадамлик қиляпти. Ушбу жамоани "Ланс" клуби 53 очко билан таъқиб қилаётган бўлса, "Лион" 45,  "Марсель" 43 ва "Лилль" 40 очко эвазига 3-5 ўринларга тақсимланган. Лига 1 чемпионатининг 25-тури 6-9 март санасида ўтказилади.

Жавоҳир Тошхўжаев, ЎзА