Футбол бўйича Европанинг кучли бешлик чемпионатларида ФИФА кунлари муносабати билан қисқа танаффус эълон қилинди. Дам олиш кунлари ушбу биринчиликларда навбатдаги тур учрашувлари ўтказилди.

Аввало, барча ўзбек футбол мухлислари эътиборидаги Англия Премьер-лигасида 3-турдан кейинги ҳолатга назар ташлаймиз. Айни дамда “Ливерпуль” клуби ўтган 3 тур мобайнида ғалаба қозонди ва 9 очко  жамғариб, яққол пешқадамга айланиб олди. Иккинчи ўринда “Челси” 7 очко билан бораётган бўлса, “Арсенал” 6 очко жамғариб, кучли учликка кириб олди. Бироқ, “Тоттенхэм”, “Сандерленд”, “Эвертон” ва “Борнмут” каби жамоаларда ҳам 6 очко мавжуд бўлиб, голлар нисбатига кўра, кейинги ўринларга жойлашди.  

“Кристал Пэлас” 5 очко билан саккизинчи поғонада қолмоқда. Тўрт очкодан тўплаган жамоалар – “Манчестер Юнайтед” , “Ноттингем Форест” , “Брайтон” ва “Лидс” 9-12 ўринларда қайд этилди. “Манчестер Сити” эса кетма-кет икки мағлубиятдан сўнг 3 очко билан 13-ўринни эгаллаб турибди. Дарвоқе, ушбу клубда тўп сураётган ҳамюртимиз Абдуқодир Ҳусанов 3-турда “Брайтон”га қарши учрашув пайтида жароҳат олди ва икки ҳафта клубига ёрдам бера олмайди. Шунингдек, “Бёрнли”, “Брентфорд” ва “Вест Хэм” ҳам бир хил – 3 очкодан тўплаган ҳолда 14-16-ўринни эгаллади.

Испания Ла Лигасида “Реал” ва “Атлетик Бильбао” жамоалари 9 очкога эга бўлиб, 1-2-ўринни забт этиб турибди. Уларни “Вильярреал”, “Барселона” ва “Эспаньол” 7 очко билан таъқиб этмоқда. Мусобақанинг олтинчи ўрнида “Хетафе” 6 очко тўплаган ҳолда бораётган бўлса, “Эльче” (7-ўрин) ва “Бетис” (8-ўрин) 5 очко жамғариб кейинги ўринларда қолмоқда. Ўтган уч турда 4 очкони ўзиники қилган “Валенсия”, “Райо Вальекано” ва “Алавес” клублари 9-11 поғоналардан жой олди. “Севилья”, “Осасуна”, “Сельта” ва “Овьедо” 3, “Реал Сосьедад” ва “Атлетико Мадрид” 2 очкога эга бўлиб 12-17-ўринларда қолди.  

Жорий мавсум Германия Бундеслигаси кескин баҳслар билан бошланди. Илк икки турдан кейин етакчилар ва чемпионликка даъвогар жамоалар аста-секин ажралиб чиқмоқда.

Биринчи ўринга муваффақиятли ўйин намойиш этган "Бавария" жамоаси жойлашди. Мюнхенликлар икки учрашувда ҳам ғалаба қозониб, рақиб дарвозасига 9 та тўп киритди ва 6 очко жамғарди. Иккинчи поғонада "Айнтрахт Франкфурт" жамоаси қайд этилган. Улар ҳам икки ўйинда тўлиқ ғалаба қозониб, 7 та гол уришга муваффақ бўлди ва 6 очко билан етакчилар қаторидан жой олди. Учинчи ўринда "Кёльн" клуби турибди. Муваффақиятли старт олган ушбу жамоа рақиблари дарвозасига 5 та тўп киритди ва 6 очко тўплади.

Франция чемпионатида 3-тур якунланди ва жадвалда “ПСЖ” 9 очко тўплаб голлар нисбатига кўра карвонбошилик қилаётган бўлса, худди шундай очкога эга бўлган “Лион” иккинчи ўринни банд этди. Кучли учликни “Лилль” 7 очко билан якунлаб берди.  

Италия А Сериясида эса бирданига тўрт жамоа карвонбошилик қилмоқда. Гап шундаки, ўтган икки тур мобайнида “Наполи”, “Ювентус”, “Кремонезе” ва “Рома” жамоалари 6 очко тўплади ва голлар нисбатига кўра 1-4-ўринларга жойлашди.  

Шу тариқа, Европа Топ-5 чемпионатларида қисқа муддатли танаффус эълон қилинди.

Жавоҳир Тошхўжаев,

ЎзА