Гренландия атрофидаги кескин вазиятдан кейин Европа яна Украинадаги уруш масаласига қайтди. Дональд Трампнинг янги божхона таҳдидлари сабаб бир муддат тўхтаб қолган тинчликка доир ҳаракатлар яна фаоллашмоқда, деб хабар берди Euronews.

Европа етакчилари АҚШнинг Киев ва Москва ўртасида тинчлик келишувига эришиш бўйича саъй-ҳаракатларини қўллаб-қувватламоқда. Яқинда Абу-Дабида АҚШ, Украина ва Россия вакиллари ўртасида музокаралар бўлиб ўтди. Украина президенти Владимир Зеленский уларни «самарали» деб атаб, навбатдаги учрашув 1 февралда бўлишини айтди. Кремль эса ҳудудий масала ҳал этилмас экан, узоқ муддатли тинчликка эришиб бўлмаслигини билдирди.

Музокаралар жараёни кенгайиб боргани сари, Европа давлатлари Россия президенти Владимир Путин билан тўғридан-тўғри мулоқотни қайта тиклаш имкониятини муҳокама қила бошлади. Франция ва Италия бу ғояни қўллаб-қувватлади. Шунингдек, Кремль билан алоқа ўрнатадиган махсус Европа вакили тайинлаш масаласи кўриб чиқилмоқда.

Шу билан бирга, Европа ва АҚШ урушдан кейин Украина иқтисодиётини тиклаш, инвестиция жалб қилиш учун махсус ҳужжат тайёрламоқда. Бу  ҳужжат Украина келажагини замонавий ва мустақил давлат сифатида шакллантиришни мақсад қилади.  

Барча режаларнинг марказида Украинанинг Европа Иттифоқига аъзо бўлиши турибди. Киев тинчлик келишувида ЕИга кириш учун аниқ сана бўлишини талаб қилмоқда. Гарчи ҳужжатларда бу сана 2027 йилнинг январь ойи деб кўрсатилган бўлсада, Брюсселдаги расмийлар бу масалани ҳал қилиш амалда қийин эканини тан олишмоқда, чунки Венгрия ҳалигача музокараларга тўсиқ қўйиб келмоқда.  

Шу билан бирга, Европа Иттифоқи Россияга қарши янги санкциялар пакети устида иш олиб бормоқда. Уларни уруш бошланган сана, яъни 24 февраль атрофида қабул қилиш режалаштирилган.    

<iframe width="484" height="860" src="https://www.youtube.com/embed/wi0U3VkxO48" title="Yevropa yana Ukrainaga e’tibor qaratmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>              

Кенжа Бекжонов, Анвархўжа Аҳмедов (видео), ЎзА