АҚШ 2025 йил Украина билан разведка маълумоти алмашишни вақтинча тўхтатгач, Европа ядро қуроли ишлаб чиқиш масаласини жиддий кўриб чиқа бошлади. 

“Bloomberg” ёзишича, Вашингтоннинг ишончсизлигидан норозилик кучайиб бораётган бир пайт кўҳна қитъа давлатлари Америка ядровий соябони ўрнини босадиган муқобил йўл изламоқда.

Ҳозир фақат Франция ва Буюк Британия ядровий қуролга эга. Бинобарин, Президент Эммануэль Макрон бутун Европа учун ядровий тўхтатув моделини таклиф қилишга тайёр. Афсуски, Америка соябонини бу икки мамлакат ядро кучи билан алмаштириш жиддий хавотир келтириб чиқаради.

Захира камлигига қарамай, Франция ва Британия жанговар каллаклари Россияга жиддий зарар етказиш учун етарли даражада кучли. Фақат жавобсиз бир савол бор: Европа катта харажат ва сиёсий хавфни ҳисобга олган ҳолда, ядро қуролига кўп миқдорда сармоя киритишга тайёрми?

Вазиятни мураккаблаштираётган яна бир жиҳат – бойитиш иншооти ва атом электр станциялари каби кучли ядровий инфратузилма яратиш ҳамда  халқаро тарқатмаслик шартномасини бузиш учун зарур сиёсий ирода. Таъкидланишича, бу масала Европа учун хавфсизлик ва юқори даражадаги хатарлар муҳокама қилинадиган Мюнхен хавфсизлик конференцияси кун тартибида муҳим ўрин эгаллайди.

С.Раҳимов, ЎзА