Европа мамлакатлари АҚШ Президенти Дональд Трампнинг Гренландия билан боғлиқ вазият муносабати билан қатор давлатларга нисбатан юқори тариф жорий этиш қарорига кескин муносабат билдирди.

“АзерТАЖ” хабарига кўра, Финляндия етакчиси Александр Стубб бундай чора трансатлантик муносабатга путур етказиши, кучли эскалация хавфини туғдириши хусусида баёнот берди. У иттифоқчилар ўртасидаги келишмовчилик босим ўтказиш эмас, балки мулоқот йўли билан ҳал қилиниши кераклигини таъкидлади.Дания ва Гренландия қўллаб-қувватланишини билдириб, ҳудудий яхлитлик ва суверенитет тамойилига содиқлигини яна бир бор тасдиқлади.

Швеция молия вазири Элизабет Свантессон мазкур бож таҳдидини бемаънилик атаб, Гренландия устидан назоратни қўлга киритиш учун тарифдан босим воситаси сифатида фойдаланиш масъулиятсизлик эканини айтди. Унинг таъкидлашича, Швеция ва Европа Иттифоқи бундай иғвогарона ҳаракатга йўл қўймайди, ЕИ таркибидаги бошқа давлатлар билан мувофиқлаштирилган ҳолда жавоб чора кўради.

Айни пайт умуман тузилма доирасида кескин чақириқ кучаймоқда. Саноат вакиллари ва сиёсатчилар мажбурлашга қарши кураш воситасидан фойдаланиш таклифини берган. Шу тариқа АҚШ компанияларига нисбатан чеклов қўйилади. Масалан, давлат хариди, инвестиция ва патентга кириш тақиқланади, ЕИдан АҚШга импорт камаяди.

Европа Парламенти асосий фракциялари ҳам Вашингтоннинг тариф таҳдиди давом этаркан, АҚШ билан савдо битими қўллаб-қувватланмаслигини билдирган.

Бинобарин, кескинлик кучайиб бораётганига қарамай, Европа етакчилари Иттифоқ ичида бирдамликни сақлаш, АҚШ билан сиёсий мулоқотни давом эттириш зарурлигини таъкидлаб, савдо қарама-қаршилиги трансатлантик муносабатда узоқ муддатли салбий оқибатга олиб келиши мумкинлигидан огоҳлантирмоқда.

Эслатиб ўтамиз, 1 февралдан Финляндия, Дания, Швеция, Норвегия, Франция, Германия, Буюк Британия ва Нидерландиядан АҚШга кираётган товарларга 10 фоизлик тариф белгиланган. 1 июнда ушбу бож 25 фоизгача кўтарилиши режалаштирилган.

Г.Сатторова, ЎзА