ЕК можаронинг қишлоқ хўжалиги маҳсулотларини етказиб бериш занжирига таъсирини камайтиришга ҳаракат қилиш учун Польша ва Украина ўртасида махсус савдо йўлларини ўрнатишни таклиф қилмоқда.

Бу ҳақда Испаниянинг “ABC” нашри хабар берди. “ABC” нашри хабарига кўра, Европанинг қишлоқ хўжалиги бўйича комиссари Януш Войцеховский Украина Польша портларидан Болтиқ денгизи орқали озиқ-овқат экспорт қила олиши учун ЕК “яшил йўлак” ташкил этишга тайёрлигини айтди. Януш Войцеховский Польша бош вазири Матеуш Моравецки билан ҳам бу масалани муҳокама қилган.

– У менга Украинани қўллаб-қувватлаш учун қўлидан келган барча ишни қилишга тайёрлигини тасдиқлади, – деди Войцеховский. Қайд этилишича, ЕК таклиф этаётган каналлар Европадан Украинага озиқ-овқат етказиб бериш учун ҳам хизмат қилиши мумкин. Шу билан бирга, Европа комиссари айни дамда украиналик қочқинларга ёрдам бериш устувор вазифа эканини ҳам таъкидлаган.